ەلباسى نۇرسۇلتان نازاربايەۆتىڭ "بولاشاققا باعدار: رۋحاني جاڭعىرۋ" ماقالاسىندا قازاق ءتىلى گرافيكاسىن لاتىن الىپبيىنە اۋىستىرۋ تاپسىرماسى باسىم باعىت بولعانى بەلگىلى. 

"قازاق جازۋىن لاتىن الىپبيىنە كوشىرۋ: جاھاندانۋ جاعدايىنداعى مەملەكەتتىك ءتىلدىڭ دامۋى" تاقىرىبىندا وتكەن حالىقارالىق عىلىمي-تاجىريبەلىك كونفەرەنسياعا قىرعىزستان، وزبەكستان، تۇركيا، ازەربايجان، رەسەي ەلدەرىنەن كەلگەن عالىمدار، وقىتۋشىلار مەن ستۋدەنتتەر قاتىستى.

ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتى اتىراۋ وبلىستىق اكىمدىگىمەن بىرلەسىپ ۇيىمداستىرعان شارانىڭ ماقساتى- قازاق جازۋىن لاتىن الىپبيىنە كوشىرۋ ماسەلەسىن تالقىلاۋ، جاھاندانۋ مەن سيفرلاندىرۋ جاعدايىندا مەملەكەتتىك ءتىلدى دامىتۋ.

ق ر مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىستار كوميتەتىنىڭ ءتوراعاسى قۋات بوراش اتقارىلىپ جاتقان شارالار جايىندا بايانداما جاسادى.

-لاتىن گرافيكاسىنا نەگىزدەلگەن قازاق ءالىپبيى جاسالدى. ەندى 2025 جىلعا دەيىن كەزەڭ كەزەڭمەن كوشۋ جوسپارلانىپ وتىر. ماۋسىم ايىنىڭ سوڭىندا ءالفاۆيتتىڭ تۇجىرىمداماسىن بەكىتىپ، قىركۇيەكتە ۇلتتىق كوميسسياعا ۇسىنامىز. سودان كەيىن لاتىن قارپىنە وقۋ-ادىستەمەلىك جاعىنان كوشۋ باستالادى-دەدى قۋات بوراش.

كونفەرەنسياعا قاتىسقان اتىراۋ وبلىسىنىڭ اكىمى نۇرلان نوعايەۆ فيلولوگتار مەن ءتىل ماماندارىنىڭ الداعى جۇمىستارىنا تابىس تىلەدى.

-لاتىن قارپىنە كوشۋ ءارقايسىمىز ءۇشىن ماڭىزدى، بۇل تاريحي وقيعا. بۇگىنگى شارا عالىمداردىڭ پىكىر الماسۋلارىنا، وسى تاقىرىپ بويىنشا تەوريالىق، تاجىريبەلىك ماسەلەلەردى شەشۋگە باعىتتالعان. لاتىن الىپبيىنە كوشۋ مەملەكەتتىك تىلىمىزگە دە وڭ ىقپال ەتەدى، قازاق ءتىلىنىڭ دامۋىنا سەپتىگىن تيگىزەدى، ونى زاماناۋي عىلىم مەن تەحنيكانىڭ تىلىنە اينالدىرادى. كونفەرەنسيادا تالقىلانعان ماڭىزدى ماسەلەلەر بويىنشا قابىلدانعان شەشىمدەر ءتيىمدى بولارىنا سەنىم بىلدىرەمىن، -دەپ اتاپ ءوتتى نۇرلان نوعايەۆ.