بيىل سەمەيدىڭ تۇيەمويناق ارالى، بوبروۆكا ساياجايى، شىعىس جانە ميرنىي كەنتتەرىندەگى حالىق سۋ تاسقىنى سالدارىنان ايتارلىقتاي ۇلكەن زارداپ شەكتى. وسىعان بايلانىستى بۇگىنگى كۇندە ۇيلەرى جارامسىز كۇيگە ءتۇسىپ، قابىرعاسى قايىسقان تۇرعىندارعا ماتەريالدىق جانە قارجىلىق كومەك كورسەتۋشىلەردىڭ سانى كۇننەن-كۇنگە ارتۋدا. ءتىپتى، قازاقستاننىڭ وزگە ايماقتارى دا بەلسەندىلىك تانىتىپ، پوەزد ارقىلى بولسا دا باسپاناسىز قالعان ازاماتتارعا قاجەت زاتتاردى كوپتەپ جىبەرۋدە.

ال بۇگىن «تارباعاتاي ەلى سىزدەرمەن بىرگە» دەپ جازىلعان اۆتوبۋسقا تيەلگەن ماكارون، ۇن، كۇرىش جانە دە تاعى دا باسقا ازىق-تۇلىك ونىمدەرى تارباعاتاي اۋدانىنان كەلىپ جەتتى. قيىن جاعدايدى باستان وتكەرىپ وتىرعان ادامدار ءۇشىن ارنالعان گۋمانيتارلىق كومەك «نۇر وتان» پارتياسى سەمەي قالالىق فيليالىنىڭ شتابىنداعى قويماعا ورنالاستىرىلدى.

تارباعاتاي اۋدانى اياگوز حالقىنا دا قول ۇشىن سوزىپ، 2 ملن تەڭگە كولەمىندە زاتتارمەن جانە ازىق-تۇلىكپەن كومەك كورسەتكەن بولاتىن.

— يگىلىكتى ءىستىڭ باستاماشىسى بولعان سەمەي قالاسىنىڭ قايىرىمدى جاندارىنا، الماتى شاھارى مەن قىزىلوردا وبلىستىق جاستار رەسۋرستىق ورتالىعىنا زور العىسىمدى بىلدىرەمىن. قازىرگى تاڭدا ءبىزدىڭ قويمادا تۇرعان ازىق-تۇلىك،كيىم-كەشەك سىندى زاتتار الداعى ۋاقىتتا ارنايى قۇرىلعان كوميسسيا مۇشەلەرى ارقىلى كوپشىلىككە تەڭدەي ءبولىپ، تەز ارادا تاراتىپ بەرەتىن بولامىز، — دەيدى «نۇر وتان»پارتياسى سەمەي قالالىق فيليالى ءتوراعاسىنىڭ ءبىرىنشى ورىنباسارى زۋلفيا جامالتدينوۆا.