وبلىس اكىمى دانيال احمەتوۆ گلۋبوكوە اۋدانىنداعى سۋ تاسقىنىنىڭ سالدارىن جويۋ جۇمىستارىنا جۇمىلدىرىلعان قۇرىلىس كومپانيالارى باسشىلارىنىڭ باسىن قوسىپ، ولارعا اتقارىپ جاتقان شارۋالارى ءۇشىن العىس ءبىلدىردى.

ايماق باسشىسىنىڭ توراعالىعىمەن وتكەن جيىندا تابيعي اپاتتىڭ سالدارىن جويۋ جۇمىستارىنىڭ كەي قورىتىندىلارى شىعارىلىپ، ءبىرقاتار مىندەت جۇكتەلدى. اتاپ ايتقاندا، وبلىس اكىمى اۋدان باسشىلىعىنا مامىر ايىنىڭ ورتاسىنا دەيىن اۋدانداعى ساتىلىپ الىنۋى ءتيىس ۇيلەرگە قاتىستى قۇجاتتار دايىن بولۋى كەرەكتىگىن ايتىپ، تاپسىرما بەردى.

– تەكسەرۋ جۇمىستارى 10 ءۇيدىڭ جوندەۋگە كەلمەيتىنىن انىقتاعان. ەندى سول ۇيلەردىڭ تۇرعىندارىن قونىستاندىراتىن باسقا باسپانالار تابۋ قاجەت. اۋدان باسشىلىعى قاجەتتى ۇيلەردى تاۋىپ تا قويىپتى. تەك قۇجاتتارىن رەسىمدەۋ جاعىندا ءبىراز كىدىرىس بار ەكەن. سول جۇمىستى تەزدەتىپ تىندىرۋ كەرەك، – دەگەن وبلىس اكىمىنىڭ سوزىنە اۋدان باسشىسى قۇجاتتار دايىن ەكەنىن ايتىپ، ەندى سول 10 ءۇيدى ساتىپ الۋعا مۇمكىندىك بەرەتىن قاراجاتتىڭ تۇسپەي جاتقانىن جەتكىزدى.

اۋدان اكىمى قاليقان بايعونىسوۆتىڭ ايتۋىنشا، بۇل ماقساتقا 39،7 ميلليون تەڭگە ءبولىنۋى ءتيىس-تىن. ءوز كەزەگىندە وبلىس اكىمى ەگەر اعىمداعى ايدىڭ ورتاسىنا دەيىن قاجەتتى قاراجات تۇسپەسە، اتالعان جۇمىس وبلىستىق بيۋدجەتتەن قارجىلاندىرىلاتىنىن جەتكىزدى. جيىندا سۋ تاسقىنىنان بۇلىنگەن ۇيلەردى قالپىنا كەلتىرۋ جۇمىستارى دا نەگىزىنەن وبلىستىق قازىنا ەسەبىنەن جۇرگىزىلىپ جاتقانى دا بەلگىلى بولدى.

– وبلىستاعى بيىلعى تاسقىننىڭ سالدارىن جويۋ جۇمىستارىنا ۇكىمەتتەن 1 ميلليارد 200 ميلليون تەڭگە كولەمىندە كومەك كورسەتىلۋى ءتيىس بولاتىن. دەگەنمەن، بۇگىنگە دەيىن تىندىرىلعان شارۋانىڭ دەنى «پارىز» قورى مەن وبلىستىق بيۋدجەتتەن بولىنگەن قاراجاتتىڭ ەسەبىنەن قارجىلاندىرىلعانىن ايتقىم كەلەدى. وسى رەتتە، ءوز اتىمنان قىزىل سۋدان زارداپ شەككەن تۇرعىنداردىڭ ۇيلەرىن قالپىنا كەلتىرۋ جۇمىستارىنا كۇن-تۇن دەمەي اتسالىسىپ كەلەتىن قۇرىلىس كومپانيالارى باسشىلارىنا ولاردىڭ شىعىندارى مىندەتتى تۇردە وتەلەتىنىنە ۋادە بەرەمىن. سىزدەردىڭ ەڭبەكتەرىڭىز ەش بولمايدى، – دەگەن وبلىس اكىمى بۇگىنگە دەيىن اتقارىلعان جۇمىسقا كوڭىلى تولاتىنىن جەتكىزدى.

ايتا كەتەيىك، بۇگىندە اۋدانداعى التاي، پروگرەسس، پرەدگورنوە اۋىلدارى مەن بەلوۋسوۆكا كەنتىندەگى اپات سالدارىن جويۋ جۇمىستارىنا 12 مەردىگەر كومپانيا جۇمىلدىرىلعان. ولار نەگىزىنەن سۋ باسقان ۇيلەردى قالپىنا كەلتىرۋ مىندەتتەرىن ءوز مويىندارىنا العان. ەستەرىڭىزگە سالايىق، ناۋرىز ايىنىڭ سوڭىندا بولعان تابيعي اپات كەسىرىنەن 150-دەن استام ءۇي سۋ استىندا قالىپ، 197 وتباسى ءقاۋىپسىز جەرگە كوشىرىلگەن-دى. سوڭعى ەسەپ بويىنشا تاسقىننان كەلتىرىلگەن شىعىن مولشەرى 187 ميلليون تەڭگەگە باعالانىپ وتىر.