وڭتۇستىك قازاقستان وبلىسىندا ەلوردامىز استانا قالاسىنىڭ 20 جىلدىق مەرەكەسىنە وراي «بەكەت باتىر» ارباتى رەسمي تۇردە اشىلىپ، لەنتاسى قيىلدى. سالتاناتتى شاراعا وبلىس اكىمى ج.تۇيمەبايەۆ ارنايى قاتىسىپ، قالا قوناقتارى مەن تۇرعىندارىن قۇتتىقتادى.

«شىمكەنت – ەلىمىزدەگى استانا مەن الماتىدان كەيىنگى ەڭ ءىرى قالانىڭ ءبىرى ەكەنى بارشاڭىزعا بەلگىلى. سونداي-اق، شىمكەنت ءوز تاريحىندا جاسىل قالا بولىپ قالىپتاسقان. بۇگىن قالانى ودان ءارى كوگالداندىرىپ، كوركىن اشاتىن دەمالىس ورىندارىن سانىن ارتتىرۋ ماقساتىندا «بەكەت باتىر» ارباتى حالىقتىڭ يگىلىگىنە پايدالانۋعا بەرىلىپ وتىر. بۇگىن مىنە وسىنداي يىگىلىكتى شارانىڭ كۋاسى بولىپ وتىرمىز. ولاي بولسا جاڭا اربات قالا تۇرعىندارىنىڭ جازدا سايالايتىن، تازا اۋامەن تىنىستايتىن دەمالىس ورنىنا اينالسىن. بارشاڭىزعا ساتتىلىك، شاڭىراقتارىڭىزعا قۇت-بەرەكە تىلەيمىن!»، – دەدى جانسەيىت تۇيمەبايەۆ.

ارباتتىڭ ۇزىندىعى ءبىر شاقىرىم شاماسىندا. وندا جاڭا شامدار ءىلىنىپ، ورىندىقتار قويىلعان. مۇنداعى 3600 شارشى مەتر اۋماق كوگالداندىرىلىپ، 2000 شارشى مەتر جەردى اياق جولدار الىپ جاتىر. بۇدان بولەك، ول جەرگە 700-گە جۋىق جوكە، تالشىن، اققايىڭ سىندى اعاش تۇرلەرى مەن 1000 ءتۇپ راۋشان گ ۇلى ەگىلدى. تۇنگى ارباتتى جارىق ەتۋگە 76 كوشە شامدارى مەن 45 كىشى تورشەرلەر قويىلدى.

سونداي-اق، وبلىس اكىمى 11، 12 شاعىن اۋداندارى ارقىلى اعىپ وتەتىن شىمكەنت كانالىنىڭ ماڭىنداعى اباتتاندىرۋ جۇمىستارىمەن تانىستى. ايماق باسشىسى سالا ماماندارىنا ۇزىندىعى 20 شاقىرىمدى قۇرايتىن سۋ ارناسىنىڭ كوپقاباتتى تۇرعىن ۇيلەر شوعىرلانعان جاعالاۋىن دەمالىس ورىندارىنا اينالدىرۋدى تاپسىرعان بولاتىن. بۇگىندە اتالعان جۇمىستار ءتيىستى دەڭگەيدە اتقارىلۋدا. كانال بويىندا 51 گاراج بولسا، ونىڭ 31ء-ىن گاراج يەلەرى ءوز ەركىمەن بۇزعان.