قىرعىزستاننىڭ ىستىق كول وبلىستىق كوشپەلى سوتىنىڭ شەشىمىمەن "الەم ءميسسيسى" ءسانيا شاكىروۆا قازا تاپقان جول اپاتىنا كىنالى 31 جاستاعى چ. ك. ەكى ايعا قاماۋعا الىندى. بۇل تۋرالى Sputnik قازاقستان حابارلادى.

"كوشپەلى وتىرىس 7 ماۋسىمدا بىشكەك تراۆماتولوگيا جانە ورتوپەديا عىلىمي-زەرتتەۋ ورتالىعىنىڭ № 4 تراۆماتولوگيا بولىمىندە ءوتتى. وتىرىستا چ. ك.-نى تۇتقىنداپ، ەكى ايعا تەرگەۋ اباقتىسىنا قاماۋعا شەشىم قابىلداندى، الايدا دارىگەرلەر ازىرگە ولاي جاساۋعا تىيىم سالدى. قازىرگى تاڭدا تەرگەلۋشىگە كۇزەت قويىلدى"، — دەپ ءتۇسىندىردى ميليسياداعىلار.

ىستىق كول وبلىستىق ءىىب باسپا ءسوز قىزمەتىنىڭ مالىمەتىنشە، تەرگەلۋشىگە 7 ماۋسىم كۇنى بۇعاناسىنا وتا جاسالۋى ءتيىس بولعان، سول ءۇشىن ونى تەرگەۋ اباقتىسىنا اكەتۋگە تىيىم سالىنعان. وتادان كەيىن ول تاعى بىرنەشە كۇن دارىگەرلەردىڭ باقىلاۋىندا بولادى. ەگەر جاعدايى جاقسارسا، قۇقىق قورعاۋشىلارعا الىپ كەتۋگە رۇقسات بەرىلەدى.   

ءسانيا شاكىروۆا قازا تاپقان جول اپاتى 3 ماۋسىمعا قاراعان ءتۇنى چوك-تال اۋىلىندا بولدى. كولىكتى ماس كۇيىندە جۇرگىزگەن 31 جاستاعى چ. ك. رولگە يە بولا الماي، جەرگىلىكتى زيراتتىڭ قورشاۋىنا سوعىلعان.