بۇگىن بەيجىڭدەگى "دياويۋيتاي" رەزيدەنسياسىندا قازاقستان پرەزيدەنتى نۇرسۇلتان نازاربايەۆتىڭ جانە 300-دەن استام قىتايلىق كاسىپكەردىڭ قاتىسۋىمەن ىسكەرلىك كەڭەس وتىرىسى ءوتتى، دەپ حابارلايدى Qamshy.kz اقپارات اگەنتتىگىنىڭ ءتىلشىسى.  

وتىرىس بارىسىندا جۇڭگو كاسىپكەرلەرى ەلباسىعا العىس ايتتى. ولاردىڭ سوزىنشە، مەملەكەتتەر اراسىنداعى ساۋدا-ەكونوميكالىق قاتىناستىڭ جاندانۋى – نۇرسۇلتان نازاربايەۆتىڭ ساياساتىنىڭ ارقاسى.

ءوز كەزەگىندە نۇرسۇلتان نازاربايەۆ ەكى ەلدىڭ ەكونوميكالىق سەرىكتەستىگىنىڭ نىعايىپ كەلە جاتقانىنا نازار اۋداردى.

– كەشەگى وتكەن كەلىسسوزدەر بارىسىندا ساۋدا قارىم-قاتىناسىن جالعاستىراتىنىمىزدى مالىمدەدىك. وندىرىستىك كەشەندەردى دامىتۋعا جۇڭگو كومپانيالارىن شاقىرامىز. قازاقستان جاڭا يننوۆاسيالىق تەحنولوگيا سالاسىن جەدەل دامىتۋ شارالارىن قولعا الدى. وسى ماقساتتا قازاقستاندا "سيفرلى قازاقستان" باعدارلاماسى جۇزەگە اسىرىلادى. ەكونوميكانى سيفرلاندىرۋ ماقساتىندا يننوۆاسيالىق جوبالاردى جۇزەگە اسىرۋ اسا ماڭىزدى. وسىعان وراي ەلىمىزدە "نازاربايەۆ ۋنيۆەرسيتەتى" سىندى يننوۆاسيالىق كلاستەر جۇمىس ىستەپ تۇر. بيىل حالىقارالىق IT-ستارتاپ تەحنوپاركى اشىلادى، - دەدى نازاربايەۆ.

بۇعان قوسا ەلباسى اگرارلىق سالاداعى ىنتىماقتاستىق نىعايىپ كەلە جاتقانىن، قىتايعا ەكسپورتتالاتىن اۋىلشارۋاشىلىعى ونىمدەرىنىڭ كولەمى ۇلعاياتىنىن جەتكىزدى. جۇڭگو ينۆەستورلارىنىڭ قازاقستاندا جۇمىس ىستەۋىنە بارىنشا ءتيىمدى جاعداي جاسالاتىنىن ايتتى.

– بۇگىنگى كەزدەسۋ قوس مەملەكەتتىڭ اراسىن ودان ارى جاقىنداستىرا تۇسەتىنىنە سەنىمدىمىن. كومپانيالار مەن كاسىپكەرلەرىمىز بيزنەستىڭ دامۋى مەن ءوزارا ىنتىماقتاستىقتىڭ نىعايۋى جولىندا ايانباي ەڭبەك ەتۋى كەرەك، - دەدى قازاقستان پرەزيدەنتى.

"سامۇرىق-قازىنا" ۇلتتىق ءال-اۋقات قورىنىڭ باسقارماسى ءتوراعاسى احمەتجان ەسىموۆ ەكى ەلدىڭ بيزنەستەگى ارىپتەستىگى ءالى دە كۇشەيەتىنىن اتاپ ءوتتى.

– بۇگىنگى ىسكەرلىك كەڭەس وتىرىسىندا 4 ساعات بويى كوپ اڭگىمە ايتىلدى. قۇرمەتتى نۇرسۇلتان ءابىش ۇلى، ءسىزدىڭ قحر باسشىسىمەن كەشەگى كەلىسسوزدەرىڭىزدى نەگىزگە الىپ، ءبىز جاقىن ارادا قىتايلىق ارىپتەستەرىمىزبەن "ءبىر بەلدەۋ – ءبىر جول" جانە "نۇرلى جول" باعدارلاماسى اياسىندا جاڭاشا باعىتتا جۇمىس ىستەيتىن بولامىز، – دەدى ەسىموۆ.

ايتا كەتەيىك، 6 ماۋسىمدا رەسمي ساپارمەن بەيجىڭگە بارعان نۇرسۇلتان نازاربايەۆتى ەرتەڭىندە جۇڭگو بيلىگى حالىق جينالىسى ءۇيىنىڭ الدىندا سالتاناتپەن قابىلدادى. ساپ تۇزەگەن اسكەريلەر قازاقستاننىڭ مەملەكەتتىك ءانۇرانىن وركەسترمەن ورىنداپ، نۇرسۇلتان نازاربايەۆقا زور قۇرمەت كورسەتتى.

شي جين پيڭ ەلباسىنا العىس بىلدىرە وتىرىپ، جارقىن بولاشاق ماقساتىندا قازاقستانمەن بىرگە جۇرۋگە دايىن ەكەنىن مالىمدەدى. ءوز كەزەگىندە نۇرسۇلتان نازاربايەۆ ءوزىن قارسى العان جۇڭگو ءتوراعاسىنا العىس ءبىلدىرىپ، قۇتتىقتاۋ ءسوزىن جەتكىزدى.

كەيىن قازاقستان مەن جۇڭگو باسشىلارى جالپى سانى 9 قۇجاتقا قول قويدى.

بۇل – ەكى ەل باسشىسىنىڭ 18ء-شى رەت جۇزدەسۋى.