ق ر اقپارات جانە كوممۋنيكاسيا ءمينيسترى داۋرەن ابايەۆ «رۋحاني جاڭعىرۋ» لوگوتيپى اياسىندا تۋعان داۋعا بايلانىستى جاۋاپ بەردى.
ءمينيستردىڭ سوزىنشە، لوگوتيپ قازاقستان رەسپۋبليكاسىنىڭ مەملەكەتتىك تۋىنان الىنعان. ءارى وسى ۋاقىتقا دەيىن «رۋحاني جاڭعىرۋ» لوگوتيپىنىڭ فرانسۋزدىق كومپانيانىڭ لوگوتيپىنە ۇقساستىعى تۋرالى ەشكىم شاعىمدانباعان.
"لوگوتيپ پلاگيات" دەپ ەشكىم شاعىم تۇسىرگەن جوق. ەكىنشىدەن، بارلىق قۇستىڭ بىردەي ەكەنىن، بارىندە قانات بار ەكەنىن ءتۇسىنۋىمىز كەرەك"، - دەدى داۋرەن ابايەۆ.
ءارى مينيستر مەملەكەتتىك باعدارلامانى جۇزەگە اسىرۋدا مەملەكەتتىك قىزمەتكەرلەردىڭ جاۋاپكەرشىلىگى زور ەكەنىنە باسا نازار اۋداردى.
"رۋحاني جاڭعىرۋ" باعدارلاماسىن جۇزەگە اسىرۋعا "رۋحاني جاڭعىرۋ" جوبالىق كەڭسەسى جاۋاپتى. وندا اقپارات مينيسترلىگىمەن قوسا بارلىق مەملەكەتتىك ورگان كىرەدى. سول سەبەپتى باعدارلامانى جۇزەگە اسىرۋدا ءبارىمىزدىڭ جاۋاپكەرشىلىگىمىز زور"، - دەدى ابايەۆ.
سونىمەن قاتار، ول لوگوتيپتىڭ وزگەرمەيتىنىن دە مالىمدەدى.
ايتا كەتەيىك، ينتەرنەت جەلىسىندە «رۋحاني جاڭعىرۋدىڭ» لوگوتيپىنە قاتىستى داۋ تۋىنداپ، ونى فرانسۋزدىق ۇيىمنىڭ سۋرەتىمەن سالىستىرا وتىرىپ، جەلى قولدانۋشىلارى ءبىرشاما سىننىڭ استىنا العان بولاتىن.
كەيىن لوگوتيپكە قاتىستى ق ر مادەنيەت جانە سپورت ءمينيسترى ارىستانبەك مۇحامەدي ۇلى ءوز پىكىرىن ءبىلدىردى.
«مەنىڭ ويىمشا، بۇل لوگوتيپتەن ءبىز ۇيالماۋىمىز كەرەك. ەمبلەما ادامدارعا رۋح سىيلاپ، جىگەرلەندىرەدى. وزدەرىڭىز كورگەندەي، سۋرەتتە ءجۇز پايىز سايكەستىك جوق. مەن ءوزىم كوردىم. كەيبىر جەرلەرىندە ۇقساستىقتار بار، ارينە، دەگەنمەن تۇستەرى ءار ءتۇرلى. بۇل ماسەلەدە بىرەۋدى پلاگيات جاسادى دەپ ايىپتاۋ دۇرىس ەمەس دەپ سانايمىن»، - دەگەن ەدى ارىستانبەك مۇحامەدي ۇلى.
