بۇگىن مەملەكەت باسشىسى بەيجىڭدە CNPC كورپوراسياسى ديرەكتورلار كەڭەسىنىڭ ءتوراعاسى ۆان يلينمەن كەزدەستى، دەپ حابارلايدى Qamshy.kz اقپارات اگەنتتىگى.

نۇرسۇلتان نازاربايەۆ CNPC كومپانياسىنىڭ مۇناي مەن گازدى ءوندىرۋ، تاسىمالداۋ جانە ونى قايتا وڭدەۋ سالالارى بويىنشا قازاقستاننىڭ نەگىزگى ارىپتەسى بولىپ سانالاتىنىنا توقتالىپ، بۇل كاسىپورىننىڭ ەلىمىزدەگى جۇمىسىنا قاناعاتتاناتىنىن ايتتى.

– جالپى وسى جىلدار ىشىندە قازاقستاندا 100 ميلليون توننادان استام مۇناي ءوندىرىلدى. ءبىز ءسىزدىڭ كومپانياڭىزبەن ىنتىماقتاستىقتى جالعاستىرۋعا دايىنبىز. اسىرەسە، «كەڭقياق-اتىراۋ» مۇناي قۇبىرىن پايدالانۋ ارقىلى ىشكى نارىققا جانە قىتايعا جەتكىزىلەتىن مۇناي كولەمىن ارتتىرا الامىز.  

كومپانيا باسشىسى CNPCء-دىڭ قازاقستانداعى ارىپتەستەرمەن 20 جىلدان استام ۋاقىتتان بەرى ىنتىماقتاسا جۇمىس ىستەپ كەلە جاتقانىن جانە زور جەتىستىكتەرگە جەتكەنىن ايتتى.  

– ءسىزدىڭ كوڭىل بولگەنىڭىزدىڭ جانە جۇڭگو ۇكىمەتى كومەگىنىڭ ارقاسىندا ايتۋلى ناتيجەلەرگە قول جەتكىزدىك. سىزگە زور قۇرمەتىم مەن ريزاشىلىعىمدى بىلدىرۋگە رۇقسات ەتىڭىز. ءبىزدىڭ مۇمكىندىگىمىزدىڭ بار ەكەنىن جانە ونى ودان ءارى دامىتىپ، جۇمىس ىستەۋگە نيەتتى ەكەنىمىزدى جەتكىزگىم كەلەدى، – دەدى ۆان يلين.

كومپانيا باسشىسى قازاقستان پرەزيدەنتىنە ىسكەرلىك كەڭەس اياسىندا جۇرگىزىلگەن كەلىسسوزدەر مەن قول قويىلعان كەلىسىمشارتتار جونىندە باياندادى.

– ۇكىمەتىمىز جانە سي سزينپين مىرزانىڭ جەكە ءوزى قازاقستاندىق ارىپتەستەرمەن تىعىز ىنتىماقتاستىقتى جاڭا دەڭگەيدە دامىتۋعا مۇددەلىلىك تانىتىپ وتىر. بۇل مىندەتتى ورىنداۋعا شامامىز جەتەتىنىنە كامىل سەنەمىز، – دەدى كومپانيا باسشىسى.

ايتا كەتەيىك، 6 ماۋسىمدا رەسمي ساپارمەن بەيجىڭگە بارعان نۇرسۇلتان نازاربايەۆتى ەرتەڭىندە جۇڭگو بيلىگى حالىق جينالىسى ءۇيىنىڭ الدىندا سالتاناتپەن قابىلدادى. ساپ تۇزەگەن اسكەريلەر قازاقستاننىڭ مەملەكەتتىك ءانۇرانىن وركەسترمەن ورىنداپ، نۇرسۇلتان نازاربايەۆقا زور قۇرمەت كورسەتتى.

شي جين پيڭ ەلباسىنا العىس بىلدىرە وتىرىپ، جارقىن بولاشاق ماقساتىندا قازاقستانمەن بىرگە جۇرۋگە دايىن ەكەنىن مالىمدەدى. ءوز كەزەگىندە نۇرسۇلتان نازاربايەۆ ءوزىن قارسى العان جۇڭگو ءتوراعاسىنا العىس ءبىلدىرىپ، قۇتتىقتاۋ ءسوزىن جەتكىزدى.

كەيىن قازاقستان مەن جۇڭگو باسشىلارى جالپى سانى 9 قۇجاتقا قول قويدى. ال بۇگىن بەيجىڭدەگى "دياويۋيتاي" رەزيدەنسياسىندا قازاقستان پرەزيدەنتى نۇرسۇلتان نازاربايەۆتىڭ جانە 300-دەن استام قىتايلىق كاسىپكەردىڭ قاتىسۋىمەن ىسكەرلىك كەڭەس وتىرىسى ءوتتى. وتىرىستا ەكى جاقتى ساۋدا-ەكونوميكالىق ىنتىماقتاستىقتىڭ ماڭىزى ءارى ونى ودان ارى نىعايتۋ ماسەلەسى ءسوز بولدى.