جۋرناليست توقتار جاقاش "نۇر وتان" پارتياسىنا زاڭمەن تىيىم سالۋدى ۇسىندى، دەپ جازادى Qamshy.kz اقپارات اگەنتتىگى. 

— ەشنارسە ماڭگىلىك ەمەس قوي. اماندىق بولسا، موڭكىپ-تۋلاماي وتىرىپ-اق وسى بيلىكتىڭ اۋىسقانىن دا كوزبەن كورەرمىز. قانشا ۋاقىت قالعانىن ءبىر قۇداي عانا بىلەدى. ال ءبىز، قازاقتار اسىقپايمىز. كۇتەمىز. سوندىقتان، قاراپ وتىرماي، جاڭا بيلىككە ءوز ۇسىنىسىمىزدى قازىردەن باستاپ جازا بەرگەنىمىز ءجون شىعار. مىسالى، زاڭدىق كۇشى الدەبىر ءمينيستردىڭ بۇيرىعىنان كەم قازىرگى كونستيتۋسيانى سول كۇيىندە اپارىپ، پانتەونعا، يەسىنىڭ جانىنا جايعاستىرا سالايىق دەر ەدىم. جالپىحالىقتىق تالقىلاۋدان وتكەن جاڭا كونستيتۋسيا كەرەك ەلگە. ەشكىم قارسى ەمەس شىعار؟ وسى كۇنگە دەيىن قابىلدانعان بۇكىل زاڭ-اكتىلەرىن ريەۆيزيالاعان دا ارتىقتىق ەتپەيدى. شەتەلدىك ينۆەستورلارمەن جاساسقان كەلىسىمدەر مەن "ءونىمدى ءبولىسۋ تۋرالى كەلىسىمدەردى" حالىققا جاريالاۋ دا كەزەكتى ءبىر دۇنيە. "وتارسىزدانۋ تۋرالى"، "ليۋستراسيا تۋرالى" زاڭدار ءبىرىنشى كەزەكتە قابىلدانسا جاقسى بولار ەدى. "ليۋستراسيا" دەمەكشى، بۇگىنگى ىرىپ-شىرىگەن بيلىكتىڭ جاندايشاپتارى الداعى ۋاقىتتا دا قوعامدى تەجەۋشى كۇشكە اينالاتىنىن ەسكەرىپ، ولاردى تىم الىس جەرگە قارعىباۋلاپ قويۋ كەرەك. كادر ماسەلەسى دە كەزەك كۇتتىرمەس ورىندا. نەپ كەزىندە لەنين الىپ ەلدىڭ ەكونوميكاسىن كوتەرۋ ءۇشىن بۋرجۋازيانىڭ وقىعان كادرلارىن ىسكە جاراتتى. بىزگە ونىڭ تۇككە دە قاجەتى جوق. وقىعان، ءبىلىمدى، ءبىراق لايىق جۇمىس تاپپاي ءار سالادا ءشوپتىڭ باسىن ءبىر شالىپ جۇرگەن جاستارىمىز قانشاما؟! ەلدىڭ الەۋەتىن كوتەرۋدى سولاردىڭ قولىنا بەرۋ كەرەك.

ساياسي بيلىك ۋزۋرپاسياعا تۇسپەيتىندەي شىن مانىندە پارلامەنتتىك رەسپۋبليكا قۇرساق قوي، شىركىن! 
ودان كەيىن، 28 جىل بويى ءسوز بوستاندىعىن شەكتەپ كەلگەن، ناۋقان سايىن حالىققا ۇيىپ-توگىپ ۋادە بەرىپ، ونىسىن ورىندامايتىن، ەلدى قايىرشىلىق جاعدايعا جەتكىزگەن، مۇشەلەرىنىڭ دەنى جەمقورلىققا باتقان "نۇر-وتان" پارتياسىن كوممۋنيستىك پارتيامەن تەڭەستىرىپ، زاڭ جۇزىندە تىيىم سالۋ كەرەك دەپ ويلايمىن!، - دەپ جازدى فەيسبۋك پاراقشاسىندا توقتار جاقاش.