قىرعىزستان مەن تاجىكستان ەكى ەل شەكارالارى اراسىنداعى داۋلى ايماقتى ءبولۋ تۋرالى كەلىسسوزدى تاياۋ ۋاقىتتا باستايدى. قىرعىزستان پرەزيدەنتى باسپا ءسوز قىزمەتىنىڭ حابارلاۋىنشا، بۇل تۋرالى قىتايدىڭ سينداو قالاسىندا وتكەن شانحاي ىنتىماقتاستىق ۇيىمى (شىۇ) ءسامميتى بارىسىندا تاجىكستان جانە قىرعىزستان پرەزيدەنتتەرى سوورونباي جەەنبەكوۆ پەن ەمومالي راحمون اراسىنداعى ەكىجاقتى كەزدەسۋدە بەلگىلى بولدى. كەزدەسۋدە نەگىزىنەن ەكى ەلدىڭ ىنتىماقتاستىعى مەن ايماقتىق قاۋىپسىزدىك ماسەلەلەرى كوتەرىلگەن. سونىمەن بىرگە ەكى ەل پرەزيدەنتتەرى قىرعىز-تاجىك شەكاراسىن دەليميتاسيالاۋ مەن دەماركاسيالاۋدى تەزدەتۋ كەرەك دەپ شەشكەن. شەكارا ماسەلەسىنە قاتىستى پرەمەر-مينيستر ورىنباسارلارى دەڭگەيىندەگى كەزدەسۋ 20 ماۋسىمدا دۋشانبەدە وتەدى.

قىرعىزستان مەن تاجىكستان شەكاراسىنداعى داۋلى ايماق جانجالعا ءجيى سەبەپ بولادى. 4 ماۋسىمدا شەكارانىڭ كەلىسىلمەگەن ۋچاسكەسىندە ەكى ەل شەكاراشىلارى جانجالداسىپ قالىپ، اۋەگە وق اتىلعان. جانجال كەزىندە قىرعىز شەكاراشىلارى تاجىكستاننىڭ ءۇش ساربازىن ۇستاعان. ءبىراق سول كۇنى ولاردى بوساتقان.

وسى وقيعادان كەيىن ەكى ەلدىڭ باس شەكاراشىلارى تاجىكستان اۋماعىندا كەزدەسىپ، جانجال تۋعان جاعدايدا ەكى تاراپ تا قارۋ قولدانباۋ تۋرالى شەشىمگە كەلگەن.