اقوردادا بۇقارالىق اقپارات قۇرالدارى سالاسىنداعى پرەزيدەنتتىڭ سىيلىقتارى، گرانتتارى مەن العىس حاتتارىن تاپسىرۋ جونىندەگى كوميسسيانىڭ وتىرىسى ءوتتى. ماجىلىسىكە ق ر مەملەكەتتىك حاتشى گۇلشارا ءابدىقالىقوۆانىڭ ءتوراعالىق ەتتى، دەپ حابارلايدى قازاقپارات.

— مەملەكەت باسشىسى نۇرسۇلتان ءابىش ۇلى وتاندىق جۋرناليستيكانى دامىتۋ ماسەلەسىنە زور ءمان بەرەدى. وسى باعىتتا جۇيەلى جۇمىستار جۇرگىزىلىپ كەلەدى. پرەزيدەنتتىڭ جۋرناليستەرگە ارنالعان سىيلىقتارى مەن گرانتتارى - وسىنداي قولداۋدىڭ ايقىن كورىنىسى. 2018 جىل قازاقستان ءۇشىن ايتۋلى وقيعامەن باستالدى. ءبىزدىڭ ەل تۇڭعىش رەت بىرىككەن ۇلتتار ۇيىمىنىڭ قاۋىپسىزدىك كەڭەسىنە ءتوراعالىق ەتىپ، بەيبىتشىلىك پەن قاۋىپسىزدىك جولىنداعى باستامالاردى ىلگەرىلەتىپ كەلەدى. سونداي-اق، ەلباسىنىڭ بەس الەۋمەتتىك باستاماسى اياسىندا حالىقتىڭ ءال-اۋقاتىن ارتتىرۋعا ارنالعان ناقتى شارالار قولعا الىنىپ جاتىر. رۋحاني جاڭعىرۋ ۇدەرىسى دە جالعاسىن تابۋدا. بيىل بۇكىل قازاقستان حالقى ەلوردانىڭ 20 جىلدىق مەرەيتويىن اتاپ وتەدى. وسى جانە باسقا دا يگى باستامالاردى ناسيحاتتاۋعا ب ا ق وكىلدەرى دە قاتىسادى. پرەزيدەنتتىڭ بۇقارالىق اقپارات قۇرالدارىنا ارنالعان سىيلىقتارى مەن گرانتتارىن تاپسىرۋ بارىسىندا وسى ايتىلعان تالاپتار مىندەتتى تۇردە ەسكەرىلۋى كەرەك، - دەيدى گ.ءابدىقالىقوۆا.   

ونىڭ ايتۋىنشا، پرەزيدەنت سىيلىعى ۇزدىك ەكى جۋرناليسكە، تاعى ەكى گرانت 36 جاسقا تولماعان جۋرناليسكە تاپسىرىلادى. ال ەلباسىنىڭ العىسى 4 شىعارماشىلىق ۇجىمعا بەرىلەدى.

«بيىل سىيلىقتىڭ يەگەرلەرى 4 ملن-نان الادى. بۇدان بولەك، التىن توسبەلگىسى تابىستالادى. ال گرانتقا يە بولعاندار 3 ملن 215 مىڭ تەڭگەدەن الادى»، - دەپ اتاپ كورسەتتى گ.ءابدىحالىقوۆا.

بيىل كوميسسيا قاراۋىنا 61 ۇسىنىم ءتۇستى. سونىڭ ىشىندە 47ء-سى جۋرناليستەرگە، ال 14ء-ى شىعارماشىلىق ۇجىمدارعا قاتىستى. 25 ۇسىنىم باسپاسوزدەن تۇسسە، 36-سى - ەلەكتروندى ب ا ق پەن تەلەكومپانيالار. كوميسسيا بارلىق ۇمىتكەرلەردى اشىق داۋىس ارقىلى تاڭدادى. ەندى، مەملەكەت باسشىسىنىڭ اتىنا ۇسىنىس جىبەرىلەدى.