اقش پرەزيدەنتى دونالد ترامپ قىتايدان يمپورتتالاتىن 50 ميلليارد دوللاردىڭ تاۋارىنا باج سالىعىن سالۋدى بەكىتتى دەپ حابارلادى ءوز دەرەككوزدەرىنە سىلتەمە جاساعان Associated Press (AP) اگەنتتىگى.

AP مالىمەتىنشە، ترامپ بۇل تۋرالى شەشىمىن ۇلتتىق قاۋىپسىزدىك جونىندەگى كەڭەسشىلەرى جانە اقق قارجى مينيسترلىگى مەن ساۋدا مينيسترلىگىنىڭ وكىلدەرىمەن كەڭەسكەن سوڭ قابىلداعان.

قىتايدان جەتكىزىلەتىن تاۋارلارعا 25 پايىز باج سالىعى سالىنادى. جاڭا ەرەجەنىڭ قاشان كۇشىنە ەنەتىنى ازىرگە ايتىلمايدى.

Wall Street Journal (WSJ) باسىلىمىنىڭ اقپاراتىنشا، سالىق سالىناتىن قىتايلىق تاۋارلار ءتىزىمى 15 ماۋسىمدا جاريالانادى. باسىلىم دەرەككوزىنىڭ مالىمەتىنە قاراعاندا، ءتىزىم جوباسىندا 1300 تاۋاردىڭ اتاۋى بار.

جۇڭگو بۇعان دەيىن اقش پرەزيدەنتى ەگەر باج سالىعىن سالسا، وندا جاۋاپ شارالارىن قابىلدايتىنىن ەسكەرتكەن.

31 مامىردا اقش ەۋروپا وداعى، مەكسيكا جانە كانادادان جەتكىزىلەتىن اليۋمينيي جانە بولاتقا باج سالىعى سالىناتىنىن جاريالاعان. 1 ماۋسىمنان باستاپ بۇل ەلدەردەن اكەلىنەتىن بولاتقا 25 پايىزدىق، اليۋمينييگە 10 پايىزدىق باج سالىعى سالىنادى. بريۋسسەل اقش-تىڭ بۇل ساياساتىن "پروتەكسيونيزم" دەپ اتاپ، 20 ماۋسىمعا دەيىن جاۋاپ شارالارىن جاسايتىنىن مالىمدەگەن.