قازاق ءتىلى ەگيپەتتە وقىلاتىن بولدى. ۋنيۆەرسيتەت باعدارلاماسىنا ءپان رەتىندە العاش رەت ەنگىزىلدى. بۇل تۋرالى قازاقستاننىڭ ەگيپەتتەگى ەلشىسى ارمان يساعالييەۆتىڭ كاير ۋنيۆەرسيتەتىنىڭ رەكتورى موحاممەد ال-حوشتوممەن كەزدەسۋى بارىسىندا ناقتىلانعان.

رەكتور ۋنيۆەرسيتەتتە ادەبيەت فاكۋلتەتىنىڭ اشىلىپ، ونداعى پاندەردىڭ قازاق تىلىندە جۇرگىزىلۋ ۇلەسىن قوسقان قازاقستان ەلشىسىنە العىسىن ءبىلدىردى. 2018-2019 جىلداردان باستاپ قازاقستان تاراپى ەلىمىزدىڭ ۋنيۆەرسيتەتتەرىنەن ەگيپەت ازاماتتارى ءۇشىن 18 ستيپەنديا ءبولدى.

ىرگەسى 1908 جىلى قۇرىلعان كاير ۋنيۆەرسيتەتى تاياۋ شىعىستاعى ەڭ ءىرى «ءال-ازحار» ۋنيۆەرسيتەتىنەن كەيىن ەكىنشى ورىندا. بۇگىندە وقۋ ورنىندا 20 فاكۋلتەت، 10 عىلىمي-زەرتتەۋ ينستيتۋتى، 1 وبسەرۆاتوريا، 2 اۋرۋحانا جانە 10 مەديسينالىق ورتالىق بار. الەمدىك رەيتينگتە جوعارى پوزيسيانى ۇستاناتىن ۋنيۆەرسيتەت فارماسيەۆتيكا سالاسى اياسىنداعى وقۋ ورىندارىنان العاشقى جۇزدىككە، مەديسينا سالاسى بويىنشا ۇزدىك 250 ۋنيۆەرسيتەتتىڭ قاتارىنا، ينجەنەرلىك سالا بويىنشا ۇزدىك ەكى جۇزدىككە جانە حيميا سالاسى بويىنشا ۇزدىك 300 ۋنيۆەرسيتەتتىڭ قاتارىنا كىرگەن.