تالدىقورعاندا مەنينگوكوكك ينفەكسياسىن جۇقتىرعان ەكى ادام جۇقپالى اۋرۋلار اۋرۋحاناسىنا ءتۇستى، دەپ حابارلايدى 24.kz.

ءقازىر ولارمەن تىعىز قارىم-قاتىناستا بولعاندار تەكسەرىلىپ جاتىر. دارىگەرلەردىڭ ايتۋىنشا، ناۋقاستاردىڭ جاعدايى وتە اۋىر. ەكەۋىنىڭ دە ورازا ۇستاپ، ايت نامازىنا قاتىسقانى بەلگىلى بولدى. جالپى الماتى وبلىسى بويىنشا وسى ۋاقىتقا دەيىن 8 مينينگوكوكك ينفەكسياسىن جۇقتىرۋ دەرەگى تىركەلسە، سونىڭ ۇشەۋى كىسى ولىمىممەن اياقتالعان.

ەرعالي سىدىمانوۆ،  وبلىستىق تۇتىنۋشىلاردىڭ قۇقىقتارىن قورعاۋ دەپارتامەنتىنىڭ باسشىسى:

- ەندى جاڭاعى ەكى اۋرۋدىڭ بىرەۋى سىزدەردىڭ كوللەگالارىڭىز. «جەتىسۋ» تەلەكومپانياسىنىڭ قىزمەتكەرى بولىپ جۇمىس ىستەيدى ەكەن. دارىگەرلەر ءتيىستى جۇمىستاردىڭ ءبارىن اتقارىپ جاتىر، دۇرىس بولادى دەپ سەنەمىز. 

باۋىرجان ساۋرانبايەۆ، قالالىق جۇقپالى اۋرۋلار اۋرۋحاناسىنىڭ ديرەكتورى:

- «مەنينگوكوكتىق ينفەكسيا، ينفەكسيوننو-توكسيچەسكيي شوك» دەگەن دياگنوز قويىلىپ، الگوريتم بويىنشا ءتيىستى ەم-شارالار جۇرگىزىلىپ جاتىر. ءقازىر جاعدايى اۋىر. 8-9 ساعاتتان كەيىن كىشكەنە وڭ وزگەرىستەر پايدا بولا باستادى.