قازاقستاندىق ادۆوكات ابزال قۇسپان شەكارانى زاڭسىز كەسىپ ءوتتى دەگەن ەتنيكالىق قازاق سايراگۇل ساۋىتبايدىڭ ىسىنە قاتىستى تەرگەۋ جۇمىستارىنىڭ بارىسىمەن تانىستىردى، دەپ حابارلايدى Qamshy.kz اقپارات اگەنتتىگى.

بۇگىن ءبىر توپ جۋرناليست پەن ابزال قۇسپان سايراگۇل ساۋىتباي جاتقان تالدىقورعانداعى تەرگەۋ يزولياتورىنا باردى. ادۆوكات ايەلمەن جەكە كەزدەسىپ، جاعدايىن ءوز كوزىمەن كورىپ، ءىستىڭ ءمان-جايىن ءبىلىپ قايتتى. تەرگەۋ يزولياتورىنا بارعان جۋرناليستەردىڭ ءبىرى ساۋلە ابەدينوۆا Facebook-تەگى پاراقشاسىندا ۆيدەو جاريالادى.

"ونى قازاقستاندا قالدىرامىز با، جوق پا؟ بۇعان قاتىستى شەشىم قابىلدانعان جوق. سايراگۇل وسىعان عانا الاڭداپ وتىر. قانداي جاعداي بولماسىن، قىتايعا جىبەرۋگە بولمايدى. تەرگەۋ اياقتالدى، ءىستىڭ ءمان-جايىن ازىرگە ايتا المايمىن. سايراگۇل دە، ءبىز دە بىلەمىز قانداي جاعداي بولعانىن"، - دەدى ابازل قۇسپان. 

سايراگۇل ساۋىتبايعا قاتىستى 368-باپتىڭ 1ء-بولىمى «شەكارانى زاڭسىز كەسىپ ءوتۋ» بويىنشا ايىپ تاعىلدى. ابزال قۇسپاننىڭ ايتۋىنشا، مۇندا ايەلدىڭ زاڭسىز ارەكەتىنەن بۇرىن ماقساتى نەگىزگە الىنادى.  ال ءدۇيىم جۇرتقا ءمالىم سايراگۇلدىڭ ماقساتى – ءوز وتباسىنا اسىقتى. تەك جۇڭگو تاراپى ونىڭ قۇجاتتارىن بەلگىسىز سەبەپتەرمەن تارتىپ العان. 

"سايراگۇل الاڭداپ وتىر. قازاقستاننىڭ تۇرمەسىندە وتىرسام دا، وسىندا قالسام بولدى"، - دەپ جەتكىزدى ادۆوكات ايەلدىڭ ءسوزىن. 

سايراگۇل ساۋىتباي ۇكىم شىققان ۋاقىتقا دەيىن تالدىقورعانداعى تەرگەۋ يزولياتورىندا وتىراتىن بولادى. تەرگەۋ قىزمەتكەرلەرى مەن ونداعى تۇرمىستىق جاعدايىنا بايلانىستى ەشقانداي شاعىمى جوق ەكەن. ءتىپتى جولداسى مەن ەكى بالاسىن دا كورە الاتىن مۇمكىندىك بار. دەنساۋلىعى دا قالىپتى. ابازل قۇسپان كۇدىكتەن ءۇمىت باسىم دەپ وتىر. تەك كوشى-قون كوميتەتى مەن پرەزيدەنت جانىنداعى كوميسسيا ارقىلى ايەلگە قازاقستان ازاماتتىعىن الىپ بەرۋ كەرەك دەيدى. سوندا ماسەلە وڭىنان شەشىلەدى. 

بيىل ءساۋىردىڭ ورتاسىندا قازاقستانعا وتكەن سايراگۇلدى مامىردىڭ 22ء-سى كەشكە 21.00-21.30-دار شاماسىندا شەكارا قىزمەتكەرلەرى، ۇيىندە وتىرعان جەرىنەن ۇستاپ اكەتكەن. سەبەبى ايەل قازاقستان شەكاراسىنان قۇجاتسىز وتكەن. ال ايەلىنىڭ قۇجاتسىز قالاي وتكەنىنەن جولداسى ءۋالي ءسىلام حابارسىز ەدى. العاشىندا جاركەنتتىڭ ۋاقىتشا تەرگەۋ يزولياتورىندا وتىردى. بىر-ەكى اپتا بۇرىن تالدىقورعان ۋاقىتشا تەرگەۋ يزولياتورىنا اۋىستىردى.