20-ماۋسىم كۇنى ماقتارالدىق تۇلەكتەردىڭ العاشقى لەگى ۇلتتىق ءبىرىڭعاي تەستلەۋدەن وتەدى. ول ءۇشىن تۇلەكتەردى ۇبت وتەتىن نىسانعا تاسيتىن ارنايى كولىكتەر دايىن تۇر. سونداي-اق، مەديسينالىق جاردەم مەن ءورت ءسوندىرۋشى كولىكتەر بەكىتىلىپ، كىرىپ-شىققان كولىكتەردى رەتتەۋ ءۇشىن ىشكى ىستەر باسقارماسىنىڭ قىزمەتكەرلەرى جۇمىس ىستەيتىن بولادى. بۇگىن بۇل تۋرالى اۋدان اكىمى جامانتاي بەيسەنبايەۆ استانا قالاسىنان كەلگەن ارنايى كوميسسيا قۇرامىمەن وتكەن وتىرىستا ءمالىم ەتتى.

جيىندى جۇرگىزگەن اۋدان باسشىسى ج.بەيسەنبايەۆ كوميسسيا مۇشەلەرىمەن ناۋقان كەزىندە ورىن الۋى مۇمكىن ماسەلەلەردىڭ الدىن الۋ بويىنشا پىكىر الماستى. اۋداندىق ۇلتتىق قاۋىپسىزدىك كوميتەتى، اۋداندىق ىشكى ىستەر باسقارماسى، اۋداندىق ورتالىق اۋرۋحانا مەن توتەنشە جاعدايلار بولىمىنەن بەكىتىلگەن ارنايى قىزمەتكەرلەرگە ءوڭىر باسشىسى تاپسىرما بەرىپ، وزدەرىنە جۇكتەلگەن مىندەتتەردى بارىنشا ۇقىپتىلىقپەن ورىنداۋعا شاقىردى.    

ۇبت وتەتىن №119 مەكتەپتەگى اۋديتوريالاردى ارالاپ كورگەن اۋدان باسشىسى مەن كوميسسيا مۇشەلەرى وقۋشىلاردىڭ سىناق تاپسىرۋىنا بارلىق جاعداي جاسالعانىنا كۋا بولدى. اتاپ ايتقاندا، اۋديتوريالاردا تۇگەلدەي جەلدەتكىشتەر ورناتىلىپ،  اۋىز سۋ، اجەتحانا ماسەلەسى شەشىلىپ، ەلەكتر جارىعىمەن قاماتاماسىز ەتۋ ءۇشىن قوسىمشا ترانسفورماتور دايىندالعان.

ۇلتتىق ءبىرىڭعاي تەستلەۋ كۇنى 30 ۇيالى تەلەفون سيگنالىن انىقتايتىن جانە 2 مەتالل انىقتايتىن قۇرىلعىلار پايدالانىلادى. سونىمەن قاتار، وقۋشىلار مەن اتا-انالاردىڭ قاۋىپسىزدىگى ءۇشىن 22 بەينەباقىلاۋ كامەرالارى ىسكە قوسىلعان.  

"قۇرمەتتى كوميسسيا مۇشەلەرى! وزدەرىڭىز كورگەندەي، اۋديتوريالاردا بارلىق تەحنيكالىق تالاپتار ساقتالعان. بالالاردى 2 رەت تاماقتاندىراتىن اسحانامىزدىڭ سانيتاريالىق تازالىعى قاتاڭ تەكسەرىلىپ، سىناقتان وتۋشىلەرگە بارلىق جاعدايدى جاساپ وتىرمىز. ەندەشە، نىساندى وزدەرىڭىزگە تاپسىرامىن" - دەدى جامانتاي قاناي ۇلى.

ايتا كەتەيىك، بيىل ماقتارال اۋدانىندا 2807 وقۋشى 4 لەكپەن ۇلتتىق ءبىرىڭعاي تەستلەۋدەن وتەدى.