2018 جىلى قازاقستانعا 54 مىڭنان اسا تمد ازاماتتارى كەلدى. بۇل تۋرالى استانا قالاسى ءىىد-نىڭ كوشى-قون قىزمەتى باسقارماسى حابارلادى.

ۆەدومستۆو بەرگەن مالىمەتكە سايكەس، اعىمداعى جىلدىڭ العاشقى 5 ايىنىڭ ىشىندە ەلىمىزگە كەلگەن ميگرانتتاردىڭ 82 پايىزى (54 722 ادام) تمد مەملەكەتتەرىنەن، ال قالعان 18 پايىزى (12 286 ادام) الىس شەتەلدەن كەلىپتى.

سونداي-اق ءىىد-نىڭ وكىلدەرى قاي مەزگىلدە شەت ەل ازاماتتارىنىڭ كوبىرەك كەلەتىنىن ايتتى.

«جاز، كوكتەم ايلارىندا شەت ەل ازاماتتارى جۇمىس ىستەۋگە كوبىرەك كەلەدى. ياعني، 27 358 ادام ەڭبەك ەتۋ ءۇشىن كەلدى»، – دەدى ءبولىم باسشىسى جاندوس يلياسوۆ.

بۇعان قوسا، 1 607 ادام قىزمەت بويىنشا؛ 36 204 جەكە ىستەرىمەن؛ 181 تۋريست رەتىندە؛ 862 ءبىلىم الۋ ءۇشىن؛ 35 ادام ميسسيونەرلىك قىزمەتپەن؛ 761 ادام باسقا دا ماقساتتارىمەن كەلگەن.

ورتالىق اشىلعالى ەلىمىزگە قىتايدان – 3 479؛ ءۇندىستاننان – 2 097؛ موڭعوليادان – 1 193؛ تۇركيادان – 795، وزبەكستاننان – 37 846، رەسەي فەدەراسياسىنان – 5 445، قىرعىزستاننان – 6 091، تاجىكستاننان – 2 251، ازەربايجاننان – 1 825 ادام كەلگەن.

ايتا كەتەيىك، 2018 جىلدىڭ 12 قاڭتارىندا استانا قالاسىندا ميگراسيالىق حقكو اشىلعان بولاتىن. اتالعان ورتالىق كوشى-قون قىزمەتىن جاقسارتۋ ءۇشىن اشىلعان بولاتىن. ونىڭ باستى ماقساتى - كوشى-قون سالاسىنداعى كەدەرگىلەردى جويۋ، سونداي-اق شەتەلدىك ازاماتتارعا مەملەكەتتىك قىزمەت تۇرلەرىن كورسەتۋ بولىپ تابىلادى. ول بويىنشا ەڭبەك ميگرانتتارى ءار 3 اي سايىن تىركەلىپ، سالىقتى تولەپ وتىرادى (1 ايعا 2 اەك، 2 ايعا – 4 اەك، 3 ايعا – 6 اەك).

ميگراسيالىق حقكو يمانوۆ كوشەسىندە، 31 ورنالاسقان. ول ساعات تاڭعى 9.00-دەن كەشكى 18.30-عا دەيىن ءۇزىلىسسىز جۇمىس ىستەيدى. بۇل جەردە مەديسينالىق تەكسەرىس پەن داكتيلوسكوپيادان ءوتىپ، ساقتاندىرۋ ءپوليسىن راسىمدەۋگە جانە جەكە سايكەستەندىرۋ ءنومىرىن الۋعا بولادى. بۇعان دەيىن شەتەلدىكتەر استانادا جۇمىس ىستەۋگە رۇقسات الۋ ءۇشىن بەس كۇن جۇرسە، ەندى رۇقساتتى ءبىر ساعاتتىڭ ىشىندە راسىمدەي الۋ مۇمكىندىگىنە يە بولدى. ال، الداعى ۋاقىتتا وسىنداي ورتالىقتى ەسىل جانە سارىارقا اۋداندارىندا اشۋ جوسپارلانىپ وتىر.

ءابدراحمانوۆا امينام احمەتجان قىزى