استانا قالاسىنداعى ميگراسيالىق حالىققا قىزمەت كورسەتۋ ورتالىعىندا سىبايلاس جەمقورلىققا قارسى كۇرەس جۇمىستارى جۇرگىزىلۋدە. بۇل تۋرالى استانا قالاسى ءىىد-نىڭ كوشى-قون قىزمەتى باسقارماسىنىڭ باستىعى ارمان بايمۇحامەت مالىمدەدى.

«سىبايلاس جەمقورلىقتى جويۋ ءۇشىن بەينە-باقىلاۋ قۇرىلعىلارىن ورناتتىق. سونداي-اق، قازىرگى تاڭدا تىكەلەي بايلانىس جوق. ال، بۇرىن بولعان ەدى. سايكەسىنشە، وسى پروسەسس سىبايلاس جەمقورلىقتى ازايتادى»، - دەدى ا. بايمۇحامەت.

دەگەنمەن، ول ءالى دە الاياقتىق ارەكەتتەرىن جۇزەگە اسىرعىسى كەلەتىندەر بارىن جاسىرمادى.

«ءالى دە الاياقتىق ارەكەتتەرىن جۇزەگە اسىرعىسى كەلەتىندەر بار، ءبىراق ءبىز ولاردى دەر كەزىندە انىقتاپ، قاجەتتى شارالاردى قولدانىپ وتىرامىز. ولار كەزەك كۇتپەي-اق، وزدەرىنە تەزىرەك قىزمەت كورسەتىلگەنىن قالايدى. بىزدە ءبارى اشىق. ەلەكتروندى كەزەك كۇتۋ جۇيەسى ورنالاسقان. سوندىقتان، ولاردى سوندا باعىتتايمىز»، – دەدى باسقارما باستىعى.

ارمان بايمۇحامەتتىڭ ايتۋىنشا، بۇل ورتالىق حالىققا قىزمەت ەتىپ، سىبايلاس جەمقورلىقتى ازايتۋ ءۇشىن قۇرىلدى. ول ەڭبەك ميگرانتتارىنا قىزمەت ەتۋدە.

ايتا كەتەيىك، 2018 جىلدىڭ قاڭتارىندا استانادا ميگراسيالىق جانە سيفرلىق حالىققا قىزمەت كورسەتۋ ورتالىعى اشىلىپ، بۇگىندە ءوز قىزمەتىن حالىققا ۇسىنۋدا. اتالعان ورتالىق كوشى-قون قىزمەتىن وڭتايلاندىرۋ ماقساتىندا اشىلعان ەلىمىزدەگى ەڭ العاشقى پيلوتتىق جوبا. ول ءوز كەزەگىندە كوشى-قون سالاسىنداعى كەدەرگىلەردى جويۋعا باعىتتالىپ، شەتەلدىك ازاماتتارعا مەملەكەتتىك قىزمەت تۇرلەرىن كورسەتۋدە.

اتالعان ورتالىقتا داكتيلوسكوپيا، مەديسينالىق پۋنكت، ەمحانالىق ساقتاندىرۋ ورنى، نوتاريۋس پەن بانك ورنالاسقان. سونداي-اق، ورتالىقتىڭ اقپاراتتىق پورتالى ىسكە قوسىلعان. وندا ميگرانتتار وز-وزدەرىنە قىزمەت كورسەتە الادى. سونداي-اق، مۇندا سيفرلىق تەحنولوگيالار قولدانىلىپ، حالىقتىڭ قاجەتىنە جاراۋدا.

جاقىندا وسىنداي ورتالىق استانا قالاسىنىڭ ەسىل جانە سارىارقا اۋداندارىندا اشىلماق. بۇعان قوسا، الماتى جانە اقتوبە قالالارىندا ميگراسيالىق حقكو اشىلادى دەپ جوسپارلانۋدا.

تاجىبەكوۆا سالتانات شورا قىزى