سيفرلىق تەحنولوگيالار جۇمىسىمىزدى جەڭىلدەتەدى. ءبىز بۇل تەحنولوگيالاردى قىزمەتىمىزدە قولدانامىز، دەيدى استانا قالاسى ءىىد-نىڭ كوشى-قون قىزمەتى باسقارماسىنىڭ باستىعى ارمان بايمۇحامەت.

ونىڭ ايتۋىنشا، ەڭبەك ميگرانتتارى ينتەرنەت ارقىلى ورتالىقتىڭ سايتىنا كىرىپ، ۋاقىتشا تۇرۋ مۇمكىندىگىن ۇزارتا الادى.

«ەڭبەك ميگرانگتارى ينتەرنەت ارقىلى پورتالىمىزعا كىرىپ، ۋاقىتشا تۇرۋ مۇمكىندىگىن ۇزارتا الادى. ال، الداعى ۋاقىتتا تاعى دا سيفرلىق تەحنولوگيالاردىڭ قولدانۋ اياسىن كەڭىتەتىن بولامىز»، – دەدى ا. بايمۇحامەت.

سونداي-اق، ەلوردادا كوشى-قون قىزمەتىن جەڭىلدەتۋ ءۇشىن اشىلعان ميگراسيالىق حقكو ءوز تيىمدىلىكتەرىن كورسەتۋدە. قۇجات الۋعا كەتەتىن ۋاقىت ازايىپ، قىزمەت كورسەتۋ اياسى وڭتايلاندىرىلدى.

«بۇرىن قۇجاتتارىن الۋ ءۇشىن شەت ەل ازاماتتارى 4 كۇننەن 6 كۇنگە دەيىن ۋاقىت جۇمسايتىن. ءقازىر 1 كۇننىڭ ىشىندە قۇجاتتارىن راسىمدەي الادى. نەگىزىندە جوسپار بويىنشا 1 ساعات دەپ ەسەپتەگەن ەدىك. بۇل ەندى پيلوتتىق جوبا بولعاندىقتان، بىرتىندەپ اتالعان كورسەتكىشكە جەتەتىن بولامىز»، – دەدى باسقارما باستىعى.

ايتا كەتەيىك، ەلىمىزدەگى ەڭ العاشقى ميگراسيالىق حالىققا قىزمەت كورسەتۋ ورتالىعى 2018 جىلدىڭ 12 قاڭتارىندا پيلوتتىق جوبا رەتىندە استانا قالاسىندا اشىلعان بولاتىن. ول ورتالىق ا. يمانوۆ 31 كوشەسىندە ورنالاسقان. اتالعان ورتالىق ساعات تاڭعى 9.00-دەن كەشكى 18.30-عا دەيىن ءۇزىلىسسىز جۇمىس ىستەيدى. ميگراسيالىق حقكو-نىڭ اشىلۋىنداعى نەگىزگى ماقسات - كوشى-قون قىزمەتىن وڭتايلاندىرۋ بولىپ تابىلادى.  ول ءوز كەزەگىندە كوشى-قون سالاسىنداعى كەدەرگىلەردى جويۋعا باعىتتالىپ، شەتەلدىك ازاماتتارعا مەملەكەتتىك قىزمەت تۇرلەرىن كورسەتۋدە. بۇگىندە ورتالىقتا بانك، ساۋساق تاڭباسىن الۋشىلار، مەديسينالىق پۋنكت، ەمحانالىق ساقتاندىرۋ ورنى مەن نوتاريۋس بار. وسىلاردىڭ بارلىعىنىڭ ءبىر ورتالىقتا شوعىرلانۋى ۋاقىتتى ۇنەمدەۋگە ءوز سەپتىگىن تيگىزىپ جاتىر.

حۋداسوۆا پەريزات كومەكباي قىزى