بۇگىن وتىرار اۋدانىندا ۇلتتىق ءبىرىڭعاي تەست تاپسىرۋ ناۋقانى باستالدى. تارىداي بوپ كىرگەن ءبىلىم ۇياسىنان ومىرلىك ءبىلىم قورجىنىن تولتىرىپ، ارمان جەبەسىنە ماقسات جۇگىن بايلاپ نىسانىنا بەت تۇزەگەن تۇلەكتەر جامبىل اتىنداعى مەكتەپ-ليسەيىنىڭ بازاسىنا جينالدى. 

وسى ورايدا اۋداننىڭ بولاشاق تىزگىن ۇستارلارىنا  اق جول تىلەپ ارنايى بارعان اۋدان اكىمى ەرلان ايتاحانوۆ وقۋشىلارمەن جۇزدەسىپ، ومىرلىك قادامنىڭ جاۋاپتى ساتىمەن قۇتتىقتادى.

– قۇرمەتتى تۇلەكتەر،  سىزدەردىڭ الدارىڭىزدا ۇلكەن بولاشاق، ۇلى ماقسات پەن مىندەت كۇتىپ تۇر. حالقىمىزدا «كىم كوپ ەڭبەكتەنسە، سول جەڭىسكە جەتەدى»- دەگەن، قاناتتى ءسوز بار.  مەكتەپتەن العان بىلىمدەرىڭىز بەن ەڭبەكتەرىڭىزدىڭ جەمىسى جوعارى بولادى دەگەن سەنىمدەمىن. 
بۇگىن - ءبىلىم بەرگەن ۇستازداردىڭ عانا ەمەس اۋداننىڭ دا سەنىمىن اقتايتىن كۇن. سوندىقتان ۇلتتىق ءبىرىڭعاي تەستىلەۋدە سابىرلىلىق تانىتىپ العان بىلىمدەرىڭىزدى دالەلدەپ، تىلەۋلەس جاندارىڭىزدى قۋانتىپ، بيىك بەلەستەردەن كورىنىڭىزدەر. سىزدەردەن بۇرىنعى اعا – اپكەلەرىڭىز ءبىلىم سىناعىنان جاقسى كورسەتكىشتەرگە قول جەتكىزىپ، اۋدانىمىزدىڭ ابىرويىن اسقاقتاتقان ەدى. سىزدەرگە دە سولاردىڭ جولىن بەرۋدى ءناسىپ ەتىپ، وبلىستاعى الدىڭعى ۇشتىكتەن كورىنۋلەرىڭىزگە تىلەكتەسپىن!"- دەدى، اۋدان باسشىسى.

ايتا كەتسەك، بيىل اۋدان بويىنشا 53 وقۋشى «التىن بەلگى»  يەگەرى اتانسا،  20  وقۋشى ۇزدىك اتتەستاتتى  قورعاپ شىقتى. اۋدان بويىنشا 711 تۇلەك اتتەستات الىپ التىن ۇيا مەكتەپتەرىنەن تۇلەپ ۇشسا، 516  وقۋشى، ونىڭ ىشىندە 509-ى  قازاق تىلىندە، 7 وقۋشى  ورىس تىلىندە ۇلتتىق ءبىرىڭعاي تەستىلەۋگە بارۋعا ءوتىنىش بىلدىرگەن. اعىمداعى  جىلى اۋداننىڭ ۇلتتىق ءبىرىڭعاي تەستىلەۋگە قاتىسۋ پايىزى 72،5 پايىزدى  قۇراپ وتىر.
 

ەلباسى نۇرسۇلتان ءابىش ۇلى نازاربايەۆتىڭ ناۋرىز ايىنداعى "پرەزيدەنتتىڭ بەس الەۋمەتتىك باستاماسى" اتتى حالىققا ۇندەۋىندە تەحنيكالىق سالاعا باسا كوڭىل ءبولۋدى ايتا كەتكەن بولاتىن. وسى ورايدا،  اتالعان سالاعا اۋدان جاس تۇلەكتەرىنىڭ  قىزىعۋشىلىعى جوعارى.

"بيىل ەلىمىز بويىنشا 15ء-شى رەت ءوتىپ وتىرعان جاۋاپتى كەزەڭدە ءبىلىمىن ءوز دەڭگەيىندە اقتاپ شىققان اۋدان شاكىرتتەرى ءتۇرلى ماماندىقتار بويىنشا ءبىلىم الىپ، تۋعان جەرگە كەلىپ ەڭبەك ەتەدى دەگەن سەنىم مول. قاشان دا ءبىلىمدى، بىلىكتى جاس كادرلاردى قاجەتتى جۇمىسپەن قامتاماسىز ەتۋگە دايىنبىز"-دەيدى، اۋدان باسشىسى ە.ايتاحانوۆ.