قازاقستان پارلامەنتى سەناتىنىڭ ءتوراعاسى قاسىم-جومارت توقايەۆ نۇرسۇلتان نازاربايەۆ 2020 جىلى ءوتۋى ءتيىس كەزەكتى پرەزيدەنت سايلاۋىنا تۇسپەيدى دەپ ەسەپتەيدى. بۇل جايىندا توقايەۆ ءوزىنىڭ سۇحباتىندا ايتتى.
سەنات ءتوراعاسىنىڭ پىكىرىنە ق ر اقپارات جانە كوممۋنيكاسيالار ءمينيسترى داۋرەن ابايەۆ پىكىر ءبىلدىردى.
— قاسىم-جومارت كەمەل ۇلى ايتقانداي، 2020 جىلعا دەيىن ءالى ءبىراز ۋاقىت بار. شەشىمدى مەملەكەت باسشىسىنىڭ ءوزى قابىلدايدى. ءبىز بۇعان 2020 جىلى سول كەزدەگى جاعدايمەن قاراۋىمىز كەرەك. كوپ جىل پرەزيدەنت قىزمەتىن اتقارعان ادام، سونىمەن قاتار ەلباسىنىڭ ساياسات پەن ەكونوميكاداعى، حالىقارالىق ىستەردەگى زور تاجىريبەسى مەن حالىقارالىق بەدەلىن ەسكەرە كەلە، قازاقستان ەلباسىنىڭ 2020 جىلعى پرەزيدەنت سايلاۋىنا قاتىسقانىنان تەك ۇتادى دەپ سانايمىن، - دەدى داۋرەن ابايەۆ.
ايتا كەتەيىك، توقايەۆ بي-بي-سيدەگى Hardtalk باعدارلاماسىنا بەرگەن سۇحباتىندا نازاربايەۆ 2020 جىلى ءوتۋى ءتيىس كەزەكتى پرەزيدەنت سايلاۋىنا تۇسپەيدى دەپ ەسەپتەيتىنىن ايتتى.
— اشىعىن ايتايىن، مەن پرەزيدەنت نازاربايەۆ 2020 جىلعى پرەزيدەنت سايلاۋىنا قاتىساتىنىنا سەنبەيمىن. ويتكەنى ول اقىلدى ادام، وتە پاراساتتى. 2020 جىلى بىزدە پرەزيدەنت سايلاۋى نازاربايەۆتان باسقا كانديداتتارمەن وتەدى دەپ ويلايمىن"، — دەدى توقايەۆ.
پىكىر قالدىرۋ