الماتى اكىمى باۋىرجان بايبەك «نۇر وتان» پارتياسىنىڭ قالالىق فيليالىنىڭ قوعامدىق قابىلداۋىندا ازاماتتاردى قابىلدادى.

مەگاپوليس باسشىسىمەن كەزدەسۋ كەزىندە بوستاندىق اۋدانىنىڭ تۇرعىنى نادەجدا ەرولسكايا «يۋجنىي» ساياباعىنىڭ جانىنان كوپقاباتتى تۇرعىن كەشەنىن سالۋ تۋرالى ماسەلە كوتەردى. كەزدەسۋگە قاتىسقان «تurkuaz Invest» كومپانياسىنىڭ باس ديرەكتورى زەكي پيلگە بۇل جەردىڭ جەكە مەنشىكتىكى ەكەنىن، سوندىقتان ءبىر ۇيدەن 100 تۇرعىننىڭ قولىن جيناۋ پروسەدۋراسىنىڭ جۇرگىزىلگەنىن ايتتى.

تاراپتاردى تىڭداعان باۋىرجان بايبەك ساياباققا جاقىن ورنالاسقان ۇيلەر تۇرعىندارىنىڭ بارلىعىنىڭ پىكىرىن ەسكەرۋ قاجەتتىگىن اتاپ ءوتتى. بۇرىن ول ساياباقتى جوندەۋ جوباسىنا اۋدان تۇرعىندارىنىڭ ۇسىنىستارىن ەسكەرە وتىرىپ تۇزەتۋلەر ەنگىزۋدى تاپسىرعان ەدى.

«سىزدەر قوعامدىق تىڭداۋلار وتكىزىپ، سودان كەيىن عانا زاڭعا سايكەس جاقىن ورنالاسقان ۇيلەر تۇرعىندارىنىڭ باسىم كوپشىلىگىنىڭ رۇقساتىن الۋعا تيىسسىزدەر. «نۇر وتان» پارتياسىنىڭ دوكتريناسىندا زاڭنىڭ ۇستەمدىگى – ادىلەتتى قوعامنىڭ نەگىزى جانە بارلىعى ءۇشىن مۇمكىندىكتەردىڭ بىردەي بولۋى اتاپ كورسەتىلگەن. 400-دەن استام تۇرعىن اكىمدىككە، پارتياعا اشىق حات جازىپ، وزدەرىنىڭ كەلىسپەيتىندىكتەرىن بىلدىرگەن ەدى. سوندىقتان 10 كۇن مەرزىم ىشىندە قالالىقتار ءوتىنىش بىلدىرگەن «نۇر وتاننىڭ» الاڭىندا قوعامدىق تىڭداۋ وتكىزىپ، زاڭ جۇزىندە شەشىم قابىلداعان ءجون»، - دەدى مەگاپوليس باسشىسى.

ءوز كەزەگىندە قالا اكىمىنىڭ ورىنباسارى سۇلتانبەك ماكەجانوۆ بۇل ماسەلە بويىنشا قالاقۇرىلىسى كەڭەسى شەشىمىنىڭ كەيىنگە شەگەرۋ جونىندە سيپات العانىن، ويتكەنى قۇرىلىستى جۇرگىزۋشى ءبىر ءۇي تۇرعىندارىنىڭ عانا كەلىسىمىن الىپ، قوعامدىق تىڭداۋدى تالاپقا ساي وتكىزبەگەنىن ايتتى. بۇدان وزگە، 2017 جىلى جەردى پايدالانۋ مەن قورعاۋدى باقىلاۋ جونىندەگى باسقارما اتالعان اۋماقتىڭ ۇزاق ۋاقىت پايدالانىلماۋى سالدارىنان بۇل ۋچاسكەگە شەكتەۋ قويعان بولاتىن.

الماتى اكىمدىگىنىڭ «سايران» اۆتوۆوكزالى مەن قالالىق يپپودرومدى تاريحي ەسكەرتكىشتەردىڭ الدىن - الا جاسالعان تىزىمىنە ەنگىزگەنى بەلگىلى بولدى. بۇلاردان وزگە، ءقىىو «اتاكەنتتىڭ» باسقارۋشى» كومپانياسى جەكە مەنشىكتەگى 8 گەكتار جەر ۋچاسكەسىن تەگىن قايتارۋ تۋرالى مىندەتتەمە قابىلدادى. بۇرىن الماتى اكىمدىگى 23 گەكتار جەردى ۋاقىتشا جالعا بەرۋ تۋرالى كەلىسىمنىڭ كۇشىن جويعان ەدى. دەگەنمەن، كورمە كەشەنىنىڭ باسشىلىعى «قالالار جاياۋ جۇرگىنشىلەر ءۇشىن» كونسەپسياسىنا ساي ايماقتى كورىكتەندىرۋ جۇمىستارىن ودان ءارى جالعاستىراتىن بولادى.

قالا اكىمىنىڭ جەكە قابىلداۋى كەزىندە ماليكا تاشپۋلتوۆانىڭ قازاقستان حالىقتارى اسسامبلەياسىنىڭ سوڭعى سەسسياسىندا جالعىز باستى جانە كوپبالالى انالار جۇمىس ىستەيتىن ءوزىنىڭ جەكە ناۋبايحاناسىن اشقىسى كەلەتىن ۇسىنىسى قارالدى. ءوتىنىم بەرۋشى ءتيىستى بيزنەس - جوسپارىن جاساعان سوڭ كاسىپكەرلىك جانە يندۋستريالدى – يننوۆاسيالىق دامۋ باسقارماسى مەملەكەتتىك قولداۋدىڭ شارالارى اياسىندا كومەك كورسەتەتىن بولادى.

ايتا كەتەرلىگى، جىل باسىنان بەرى قاراي قالادا 12،3 مىڭ جۇمىسسىز بەن ءوز بەتىنشە ارەكەت ەتۋشى جۇمىسپەن قامتىلدى، ولاردىڭ 40% -ى ايەلدەر. جىل اياعىنا دەيىن تاعى 32 مىڭنان استام ادام جۇمىسقا تارتىلادى.

«نۇر وتان» الاڭىندا ناۋرىزباي اۋدانىنىڭ تۇرعىنى بيبىگۇل حودجانوۆانىڭ №192 ءجالپىبىلىم بەرەتىن مەكتەپتىڭ جاياۋ وتپەلى جولى ماڭىنان جارىقديودتى جارىق كوزىن ورناتۋ مەن «دىبىستى جولاقتار» جاساۋ جونىندەگى ۇسىنىسى دۇرىس شەشىمىن تاپتى.

جالپى، سوڭعى جىلدارى 105 جاياۋ وتپەلى جولدار رەتكە كەلتىرىلدى، 49 كم جاڭا جارىق كوزدەرىنىڭ جەلىلەرى تارتىلدى، 33،6 مىڭ شىراق پەن 5،5 مىڭ باعانا اۋىستىرىلدى. بيىلعى جىلى تاعى 80 كم جاڭا جەلى تارتىلادى.

باۋىرجان بايبەك الماتىلىق اليشەر مامەدالييەۆتىڭ رۇقساتسىز كولىك تۇراقتارىنىڭ جۇمىسى جونىندەگى شاعىمىن دا قارادى. شاعىمدانۋشى №5 قالالىق كلينيكالىق اۋرۋحانانىڭ وڭتۇستىگىنە قاراي اقىلى كولىك تۇراعىنىڭ جۇمىس ىستەيتىنىن، مۇندا بەلگىسىز جانداردىڭ كولىك تۇراعىنىڭ اقىسىن قولما-قول جيناپ الىپ، فيسكالدى چەكتەردى بەرمەيتىنىن ايتتى.

الماتى اكىمى جەكە قابىلداۋى بارىسىندا الاتاۋ اۋدانىنىڭ تۇرعىنى ايگۇل تاجييەۆانىڭ ءۇي اۋلاسىنداعى درەناجدى جۇيەنىڭ قاناعاتتانعىسىز ەكەندىگىنە الاڭداۋشىلىق بىلدىرەتىنىن تىڭداپ، ءتيىستى باسقارمالارعا ءوتىنىمدى كەشەندى قاراۋدى تاپسىردى.

ايتا كەتەرلىگى، سوڭعى ەكى جىلدا قالادا 732 اۋلا، 185 ءۇي، 222 ليفت جوندەۋدەن ءوتتى. جىل اياعىنا دەيىن اباتتاندىرىلعان اۋلالار سانىن 37%-عا جەتكىزۋ نەمەسە ولاردىڭ جالپى سانىنىڭ ىشىنەن 1400 اۋلانى جوندەۋ جوسپارلانعان.