بۇل – شاھار بيلىگى قولعا العان ەكولوگيالىق تاجىريبە، دەپ جازادى 24.kz.
مەيرامحانالار قولدانعان مايدى جيناپ، وڭدەۋگە جىبەرەدى. ودان دايىندالعان وتىندى سۋ كولىكتەرى پايدالانادى. قالا اكىمدىگى وسىلايشا تاريحي ەسكەرتكىشتەرگە نۇقسان كەلتىرەتىن اۋاداعى زياندى قالدىقتىڭ مولشەرى كۇرت ازاياتىنىنا ءۇمىت ارتىپ وتىر.
مايعا قۋىرىلعان تەڭىز ونىمدەرى ۆەنەسيادا ەڭ تاراعان تاعامداردىڭ قاتارىندا. قالاداعى مەيرامحانالاردىڭ مازىرىنە مىندەتتى تۇردە قۋىرىلعان اس شايانى نەمەسە كالمارلار كىرەدى. ال دايىنداۋ ءۇشىن كوپ مولشەردە كەتەتىن وسىمدىك مايىن ەندى كادەگە جاراتىپ ءجۇر.
سيمونە ۆەنتۋريني، ۆەنەسيانىڭ ەكونوميكالىق دامۋى جونىندەگى كەڭەسشى:
- «شىعىنسىز ەكونوميكا» ۇدەرىسى جۇزەگە اسىپ جاتىر. ەندى قالدىقتاردى دا وزگە وندىرىستە قولدانىپ ءجۇر. پايدالانعان مايدى اعىزىپ جىبەرسەڭىز، اينالامىزداعى سۋدى لاستايدى. ال وتىن شىعارۋعا قولدانساق، قورشاعان ورتاعا پايداسىن تيگىزەدى.
ۆەنەسيادا قولدانىلعان مايدى جيناۋعا ارنايى كونتەينەرلەر ورناتىلعان. كەيىن وڭدەۋ ءۇشىن زاۋىتقا جەتكىزىلەدى.
دجاكومو ريسپولي، Eni Refining&Marketing ءبولىم ديرەكتورى:
- مايدى ءبىر ءسۇزىپ العاننان كەيىن ءبىزدىڭ ءبيووندىرىس زاۋىتىنا جىبەرەدى. ول جانارماي شىعارۋ ءۇشىن شيكىزات رەتىندە قولدانىلادى. ناتيجەسىندە دايىن بولعان جوعارى ساپالى وتىننىڭ 20 پايىزى وسىمدىك مايىنان تۇرادى دەسەك بولادى.
انتونيو فەرراري، كولىك كومپانياسىنىڭ تەحنيكالىق قىزمەت كورسەتۋ مامانى:
- زياندى قالدىقتاردى ازايتاتىن وتىن تۇرىنە كوشۋ وتە ماڭىزدى قادام بولۋى مۇمكىن. قولدانىلىپ جۇرگەن قوزعالتقىشتاردى اۋىستىرماي، جاڭا تەحنولوگيالاردى ەنگىزۋگە كەتەتىن قارجىنى ۇنەمدەيمىز.
ۆەنەسيا كانالدارىمەن جۇرەتىن ايگىلى «ۆاپورەتتيلەر» ىلعي ادامعا تولى، سول سەبەپتەن جانارمايدى كوپ مولشەردە قاجەت ەتەدى. جولعا شىقپاس بۇرىن 150 تەپلوحودتىڭ ءارقايسىسى ەكولوگيالىق وتىندى تولتىرىپ قۇيىپ الادى. بۇل تاجىريبە جىلدىڭ سوڭىنا دەيىن جالعاسادى.
