سالتاناتتى شارا بارىسىندا الماتى اكىمى باۋىرجان بايبەك قازاقستانننىڭ مەملەكەتتىك رامىزدەرى وتانىمىزدىڭ تاريحى مەن ءداستۇرىن جانە حالقىمىزدىڭ قايتالانباس ەرەكشەلىگى مەن ۇلىلىعىن پاش ەتەتىنىن اتاپ ءوتتى.
«تاۋەلسىزدىكتىڭ العاشقى كۇنىنەن باستاپ پرەزيدەنتتىڭ بارلىق باعدارلامالارى مەن رەفورمالارى قاراپايىم قازاقستاندىقتارعا، ەڭ الدىمەن جاستارعا باعىتتالدى. بيىلعى جىلى جاريالانعان ەلباسىنىڭ «بەس الەۋمەتتىك باستاماسى» جاس وتباسىلاردىڭ تۇرعىن ءۇي جاعدايىن جاقسارتۋعا، ستۋدەنتتىك جاتاقحانالار ماسەلەسىن شەشۋگە، ساپالى جوعارى ءبىلىم الۋعا كەڭ مۇمكىندىك بەرەدى. وسىناۋ بازالىق باستى نەگىزدەر ءاربىر جاس ادامنىڭ ءوز الەۋەتىن جۇزەگە اسىرۋعا، تابىسقا جەتۋىنە جول اشادى»، - دەپ اتاپ ءوتتى مەگاپوليس باسشىسى.
ايتا كەتەرلىگى، بيىلعى جىلى قالادا جاستارعا ارنالعان قالالىق «الماتى جاستارى» تۇرعىن ءۇي باعدارلاماسى ودان ءارى جالعاساتىن بولادى. جاس وتباسىلار العاشقى جارناسىز 5%-دىق نەسيەمەن پاتەر الۋلارى ءۇشىن جەرگىلىكتى بيۋدجەتتەن 2 ملرد. تەڭگە ءبولىندى. جەكە بالا باقشالاردا 3 مىڭداي بالاعا مەكتەپ جاسىنا دەيىنگى ءبىلىم بەرۋ ءۇشىن مەملەكەتتىك تاپسىرىس ۇلعايىپ، 850 ملن. تەڭگە ءبولىندى. قارت ادامداردى مەگاپوليستەگى بەلسەندى ومىرگە تارتۋ ءۇشىن اعا ۇرپاققا ارنالعان «بەلسەندى ۇزاق ءومىر» ارنايى باعدارلاماسى جاسالدى.
مەملەكەتتىك رامىزدەر كۇنى قۇرمەتىنە «حالىك ارەنا» مۇز كەشەنىنىڭ ساحناسىندا اسكەري وركسترلەر ۇجىمدارى مەن قازاق ەسترادا جۇلدىزدارى، سونىڭ ىشىندە روزا رىمبايەۆا، التىناي جورابايەۆا، ءالي وقاپوۆ جانە باسقالارى ونەر كورسەتتى. بۇگىن پانفيلوۆ كوشەسى بويىمەن اباي اتىنداعى وپەرا جانە بالەت تەاترىنان جىبەك جولى كوشەسىنە دەيىن وركەسترلەردىڭ مەرەكەلىك شەرۋى وتەدى.
