الماتى اكىمى باۋىرجان بايبەك مەگاپوليستىڭ جەتەكشى تۋروپەراتورلارىنىڭ قاتىسۋىمەن «ءتۋريزمدى دامىتۋدىڭ 100 قادامى» قالالىق باعدارلاماسىن جۇزەگە اسىرۋ بويىنشا كەڭەيتىلگەن كەڭەس وتكىزدى.

سوڭعى ءۇش جىلدا شەتەلدىك تۋريستەر سانى 14%-عا ءوستى. الماتىدا بيىلعى جىلدىڭ العاشقى توقسانىندا وڭتۇستىك كورەيادان، ينديا مەن رەسەيدەن، قحر-نان، تۇركيادان، اقش پەن گفر-نان 130 مىڭنان استام ادام بولدى. ونىڭ ۇستىنە تۋريستىك لەكتىڭ 80%-عا جۋىعى قالعان ءۇش توقساندا كەلەدى.

قالا اكىمىنىڭ ورىنباسارى اسەل ءجۇنىسوۆا ءوزىنىڭ سوزىندە حالىقارالىق «ەكسپو-2017» كورمەسىنىڭ، بۇكىلالەمدىك ۋنيۆەرسيادانىڭ، وەسر ەۋرازيالىق اپتالىعىنىڭ، سونىمەن قاتار «Star of Asia»، «Spirit of Tengri»، «ۇلى دالا ويىندارى»، «الماتى مارافون» جانە «Tour of Almaty» سىندى مۋزىكالىق، سپورتتىق شارالاردىڭ ءوتۋى تۋريستەر لەگىنە وڭ ىقپال ەتكەنىن اتاپ ءوتتى.

«بۇگىنگى كۇنى قالا ەكونوميكاسىنىڭ 87%-ىن قىزمەت كورسەتۋ سالاسى قۇرايدى، الايدا الماتىنىڭ جالپى وڭىرلىك تابىسىندا ءتۋريزمنىڭ ۇلەسى نەبارى 1،5%. مەگاپوليستىڭ تۋريستىك الەۋەتىن ارتتىرۋ ماقساتىندا الماتى اگلومەراسياسىنىڭ تاۋ ءتۋريزمى بويىنشا شەبەرلىك - جوسپارى جاسالدى، ونىڭ قۇرامىنا مەدەۋ، شىمبۇلاك، الماتاۋ جانە بۋتاكوۆكا ەندى. بيىلعى جىلى الەمدىك دەڭگەيدەگى Kempinski جانە Novotel وتەلدەرىنىڭ، ءتۇرلى بۋتيك – وتەلدەر مەن حوستەلدەردىڭ قۇرىلىستارىن اياقتاۋ جوسپارلانعان. جىل اياعىنا دەيىن 14 حالىقارالىق اگەنتتىكتەر ءۇشىن بۇۇ-نىڭ وڭىرلىك حاب-ى اشىلادى. ءپاريجدىڭ، ستامبۋلدىڭ، بانگكوكتىڭ تاجىريبەسى مۇنداي شارانىڭ شەتەلدىك تۋريستەر لەگىن ۇلعايتاتىنىن، حالىقارالىق دەڭگەيدە قالانىڭ تانىمدىلىعىن ارتتىراتىنىن كورسەتتى»، - دەدى اسەل ءجۇنىسوۆا.

ول سونىمەن قاتار قازىرگى كەزدە تۋريستەردىڭ كوپشىلىگى ءوز بەتتەرىنشە ساپارعا شىعاتىنىن، ارنايى ۆەب-تۇعىرلار ارقىلى دەمالىستارىن جوسپارلايتىنىن ايتتى.

«جىل سايىن الماتىعا دەگەن قىزىعۋشىلىق ارتۋدا، ونى دەستيناسيا ارقىلى الەمدىك TripAdvisor تۇعىرناماسىنان كورۋگە بولادى، وندا قالاعا قاتىستى سۇرانىس 465 تەن 66 824 وتىنىمگە وسكەن. بۇل تۇعىرنامانى كوبىنەسە اقش-تىڭ، رەسەيدىڭ، ۇلىبريتانيا مەن ينديانىڭ، گەرمانيانىڭ ازاماتتارى پايدالانادى»، - دەپ ءسوزىن جالعاستىردى.

ءوز كەزەگىندە مەگاپوليس اكىمىنىڭ ورىنباسارى مۇرات دارىبايەۆ الماتىنىڭ باستى تۋريستىك «قاقپاسى» رەتىندە كولىك توراپتارىنىڭ مودەرنيزاسيالانىپ جاتقانىن ايتتى.

ول كەلەسى ايدان باستاپ بارلىق قالاارالىق جانە حالىقارالىق رەيستەردىڭ «سايران» اۆتوۆوكزالى ارقىلى ىسكە اساتىنىن جەتكىزدى. قازىرگى كەزدە عيمارات قايتا جاسالۋدا، ونىڭ اينالاسى اباتتاندىرىلىپ، كولىك-لوگيستيكالىق ينفراقۇرىلىم مودەرنيزاسيالانۋدا.

«بارلىق زاڭسىز كونسترۋكسيالار الىنىپ تاستالدى. عيماراتتىڭ كىرە بەرىس بولىگىن قايتا جاساۋ جوسپارلانعان، سونىمەن قاتار تاكسي تۇراقتارى مەن حالىقارالىق قاتىناس ايماعى كەڭەيەدى. نىسان ىشىندە لوكالدى تۋريستىك ورتالىق ۇيىمداستىرۋ قاراستىرىلۋدا، وعان جاقىن جانە الىس شەتەلدەرمەن جۇمىس جاسايتىن قالالىق تۋروپەراتورلار ورنالاساتىن بولادى. اۆتوۆوكزال عيماراتىنىڭ ىشىندە قوعامدىق تاماقتاندىرۋ نۇكتەلەرىن اشۋ ءۇشىن حالىقارالىق برەندتەرمەن كەلىسسوزدەر جۇرۋدە»، - دەپ باياندادى مۇرات دارىبايەۆ.

بۇلاردان وزگە، «قازاقستان تەمىر جولىمەن» بىرگە «الماتى-1» جانە «الماتى-2» تەمىرجول ۆوكزالدارىن قايتا جاساۋ جۇمىستارى جۇرۋدە. 200 ءاۆتوموبيلدى قىسقا پروكاتكا بەرۋ سەرۆيسىن اشۋ جوسپارلانعان. ەگەر وتكەن جىلى الماتىدا قوعامدىق كولىكتىڭ 479 بىرلىگى الىنسا، بيىلعى جىلى تاعى دا 569 جاڭا اۆتوبۋس قاتارعا قوسىلادى.

كەڭەس بارىسىندا وعان قاتىسۋشىلار پاتەرلەرىن قىسقا مەرزىمدى جالعا بەرەتىن كاسىپكەرلەردىڭ جۇمىسىن رەتتەۋگە باسا نازار اۋداردى: «قازىرگى كەزدە ماگيسترالدى كوشەلەردىڭ بويىندا تۇرعان ادامدار پاتەرلەرىن تاۋلىك بويىنا ۇسىنادى. ولاردىڭ جۇمىسى كولەڭكەلى، سالىق تولەمەيدى. پاتەرلەرىن جالعا ۇسىنعاندىقتان، مۇمكىن ولاردى زاڭداستىرعان ءجون شىعار. ءبىرىڭعاي نۇكتە ۇيىمداستىرىپ، ولارعا جاعداي جاساۋ قاجەت بولار. جۇمىستارىن جاساسىن، ءبىراق رەسمي تۇردە».

بۇلاردان وزگە، تۋريستەردى تاسىمالدايتىن تۋريستىك كومپانيالار اۆتوبۋستارىنىڭ سەرتيفيكاتتارى قارالاتىن بولادى. بۇل شارا قاۋىپسىزدىك پەن قىزمەت كورسەتۋ ساپاسىن ارتتىرادى.

كەزدەسۋ بارىسىندا قازاقستاندىق تۋريستىك اسسوسياسيا ديرەكتورى راشيدا شايكەنوۆا ىلە- الاتاۋ ساياباعىندا تۋريستەردىڭ سۋرەتكە جانە ۆيدەوعا تۇسكەندەرى ءۇشىن اقشا تولەۋدىڭ قانشالىقتى زاڭدى ەكەنى تۋرالى ماسەلە كوتەردى.

جيىنعا قاتىسىپ وتىرعان ىلە-الاتاۋ پاركىنىڭ باس ديرەكتورى دامير مالگەلدييەۆ تەك كوممەرسيالىق تۇسىرىلىمدەرگە عانا اقشا تولەنەتىنى تۋرالى جاۋاپ بەردى. ەگەر ينسپەكتور كەلۋشىلەردەن اقشا تالاپ ەتەتىن بولسا، شارا قولدانۋ ءۇشىن اكىمشىلىككە جۇگىنۋ كەرەكتىگىن ايتتى. ول ءوزىنىڭ سوزىندە ىلە-الاتاۋ پاركىن ودان ءارى دامىتۋ تۋرالى ديرەكسيانىڭ ارنايى كونسەپسيا جاساعانىن، بۇل قۇجاتتى الماتى قالاسى قوعامدىق كەڭەسى مۇشەلەرىنىڭ ءجىتى قاراپ شىعاتىنىن اتاپ ءوتتى.

ەسكە سالساق، قالا كەڭىستىگى جايلىلىعىن قالىپتاستىرۋ ماقساتىندا الماتىدا بيىلعى جازدا 150-دەن استام كوشە جوندەلەدى، 30 كم تروتۋارلار جاسالادى، 600 اۋلا كورىكتەندىرىلەدى. بارلىق جەر استى وتپەلى جولدار كۇردەلى جوندەلەدى، جاڭا فونتاندار سالىنادى. بۇرىن قايتا جاسالعان پانفيلوۆ، جىبەك جولى، گوگول، قابانباي باتىر، بايسەيىتوۆا، تولەبايەۆ كوشەلەرى مەن «استانا» الاڭىنان وزگە مەگاپوليستىڭ ءبىرقاتار نەگىزگى داڭعىلدارى تۇگەلدەي جاڭارادى.