قاراعاندى وبلىسىنىڭ اكىمى ەرلان قوشانوۆتىڭ بۇيرىعىمەن قازاقستان رەسپۋبليكاسىنىڭ پرەزيدەنتى اكىمشىلىگىمەن جانە قالالىق ماسليحاتپەن كەلىسىلە وتىرىپ بەگىموۆ قايرات باياندى ۇلى جەزقازعان قالاسىنىڭ اكىمى قىزمەتىنە تاعايىندالدى، دەپ حابارلايدى Qamshy.kz اقپارات اگەنتتىگى. 

قايرات باياندى ۇلى 1968 جىلى تۋعان.  ەكى جوعارى ءبىلىمى بار. 1992 جىلى قاراعاندى پوليتەحنيكالىق ينستيتۋتىن، 2004 جىلى الماتى ەكونوميكا جانە ستاتيستيكا اكادەمياسىن ءتامامدادى. ماماندىعى بويىنشا ءوندىرىس كولىگىنىڭ ينجەنەرى، ەكونوميست. 
ەڭبەك جولىن «قاراعاندىكومىر» بىرلەستىگىندە باستاعان.  وكتيابر اۋدانىنىڭ اكىمى، قاراعاندى قالاسى اكىمىنىڭ كوممۋنالدىق ماسەلەلەر بويىنشا ورىنباسارى قىزمەتىندە بولعان. وبلىستىق قۇرىلىس باسقارماسى باسشىسىنىڭ ورىنباسارى لاۋازىمىندا جۇمىس جاسادى. 
2015 جىلدىڭ شىلدە ايىنان باستاپ وبلىستىق ەنەرگەتيكا جانە تۇرعىن ءۇي كوممۋنالدىق شارۋاشىلىعى باسقارماسىنا باسشىلىق ەتكەن.

ەسكە سالايىق، 21 مامىردا بۇرىنعى اكىم باتىرلان احمەتوۆ ءوز وتىنىشىمەن قىزمەتتەن كەتكەن بولاتىن.