وتىرىس اياسىندا قازاق ءالىپبيىن 2025 جىلعا دەيىن لاتىن گرافيكاسىنا كەزەڭ-كەزەڭمەن كوشىرۋ جونىندەگى شارالار جوسپارىن ىسكە اسىرۋ بارىسى قارالدى، سونداي-اق، جاڭا ءالىپبيدىڭ ەملە ەرەجەلەرى مەن پەرنەتاقتانىڭ تەحنيكالىق ورنالاسۋىن ازىرلەۋ بويىنشا جۇمىستى ودان ءارى ۇيلەستىرۋ ماسەلەلەرى تالقىلاندى.
ءالىپبيدى لاتىن گرافيكاسىنا كوشىرۋ اياسىندا جۇرگىزىلىپ جاتقان جۇمىستىڭ نەگىزگى باعىتتارى بويىنشا مادەنيەت جانە سپورت ءمينيسترى ا. مۇحامەدي ۇلى، ءبىلىم جانە عىلىم ءمينيسترى ە. ساعادييەۆ، اقپارات جانە كوممۋنيكاسيالار ءمينيسترى د. ابايەۆ بايانداما جاسادى.
ا. مۇحامەدي ۇلى بۇگىندە ءتىل ماماندارىنىڭ قاتىسۋىمەن جۇمىس توبى لاتىن گرافيكاسى نەگىزىندە قازاق ءالىپبيىنىڭ ەملە تۇجىرىمداماسىن ازىرلەگەنىن اتاپ ءوتتى.
«قازىرگى تاڭدا قازاق ءتىلىنىڭ ورفوگرافياسى مەن ەملە ەرەجەلەرىنىڭ نەگىزگى تارتىپتەرىن ازىرلەۋ بويىنشا كۇنتىزبەلىك جوسپاردىڭ كەستەسى دايىندالدى. جالپى، ەلىمىز ءۇشىن ماڭىزدى ءتىل رەفورماسى قازاق ءالىپبيىن 2025 جىلعا دەيىن لاتىن گرافيكاسىنا كەزەڭ-كەزەڭمەن كوشىرۋ جونىندەگى شارالار جوسپارىنا سايكەس جۇزەگە اسىرىلىپ جاتىر»، — دەدى ا. مۇحامەدي ۇلى.
ە. ساعادييەۆ بۇگىنگى تاڭدا ا. بايتۇرسىنوۆ اتىنداعى ءتىل ءبىلىمى ينستيتۋتىنىڭ قازاق جانە تۇركى تىلدەرىندەگى تەرمين جاسامىنىڭ حالىقارالىق قاعيدالارى مەن ەرەجەلەرىن زەرتتەپ، ۇلتتىق تەرمينولوگيا كريتەرييلەرىن ازىرلەگەنىن حابارلادى.
وتىرىس بارىسىندا، سونداي-اق، پرەمەر-مينيستردىڭ ورىنباسارى ە. دوسايەۆ، پارلامەنت سەناتىنىڭ دەپۋتاتى م. باقتيار ۇلى، پارلامەنت ءماجىلىسىنىڭ دەپۋتاتى ب. مامرايەۆ، ءتىل ءبىلىمى ينستيتۋتىنىڭ ديرەكتورى ە. قاجىبەك، فيلولوگيا عىلىمدارىنىڭ دوكتورى، اباي اتىنداعى قازاق ۇلتتىق ۋنيۆەرسيتەتىنىڭ كافەدرا مەڭگەرۋشىسى ت. اياپوۆا، ش. شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىنىڭ اتقارۋشى ديرەكتورى ە. تىلەشوۆ جانە ت.ب. پىكىر ءبىلدىردى.
