الماتى اكىمى باۋىرجان بايبەك قازاقستان رەسپۋبليكاسىنداعى رەسەي فەدەراسياسىنىڭ توتەنشە جانە وكىلەتتى ەلشىسى الەكسەي بوروداۆكينمەن كەزدەستى. تاراپتار ساۋدا-ەكونوميكالىق جانە مادەني-گۋمانيتارلىق ماسەلەلەردى تالقىلادى.

رەسەي قازاقستاننىڭ تۇراقتى ەكونوميكالىق سەرىكتەسى بولىپ تابىلادى. الماتى مەن رەسەي فەدەراسياسى اراسىنداعى تاۋار اينالىمى تۇراقتى وسۋدە، سوڭعى جىلداعى كورسەتكىش 22%-عا ارتقان. الماتى اكىمدىگى مەن ماسكەۋ، سانكت-پەتەربۋرگ جانە قازان مەريالارى بىرنەشە باعىتتار بويىنشا ىنتىماقتاسىپ، جۇمىس ىستەۋدە.

قالادا رەسەيلىك كاپيتالمەن 2 مىڭنان استام كاسىپورىن ساۋدا، قارجى، مەديسينا، ونەركاسىپ جانە باسقا سالالاردا جۇمىس ىستەيدى. قازىرگى كەزدە يندۋستريالدى ايماقتا كابەل وتكىزگىش ونىمدەر شىعاراتىن رەسەيلىك «KMK Investment» زاۋىتى سالىنۋدا.

كەزدەسۋ بارىسىندا رەسەي فەدەراسياسىنىڭ ەلشىسى ەكى ەل پرەزيدەنتتەرى مەن ەكى ەل حالىقتارى اراسىندا قاشاندا ءوزارا سەنىم مەن دوستىق قاتىناستىڭ قالىپتاسقاندىعىن اتاپ ءوتتى.

«بۇگىنگى كۇنى ەاەس اياسىندا بىرىككەن اۋقىمدى جوبالار جۇزەگە اسۋدا. سونىمەن قاتار ەكى جاقتى ءتۋريزمدى دامىتۋدا، ءبىلىم باعدارلامالارىنىڭ اياسىن كەڭەيتۋدە ءوزارا ۇندەستىك كەڭ قانات جايۋدا. ورتا ازياداعى ەڭ ءىرى قالا رەتىندە الماتى ءتۇرلى حالىقارالىق فورۋمداردى، كونفەرەنسيالار مەن فەستيۆالدەردى وتكىزۋدە، بۇلارعا رەسەي دەلەگاسياسى بەلسەندى قاتىستى. جاقىن كۇندەرى عانا ودكب سىرتقى ىستەر مينيسترلەرىنىڭ ءسامميتى، ەۋرازيالىق مەديا فورۋم ءوتتى. وسىنىڭ بارلىعى مادەني جانە ىسكەرلىك بايلانىستاردى ودان ءارى دامىتۋعا ىقپال ەتەدى»، - دەپ اتاپ ءوتتى الەكسەي بوروداۆكين.