الماتى اكىمى باۋىرجان بايبەك فرانسيا ۇلتتىق اسسامبلەياسىنىڭ دەپۋتاتى، «فرانسيا-قازاقستان» پارلامەنتارالىق دوستىق توبىنىڭ ءتوراعاسى پەر كابارەمەن كەزدەستى. تاراپتار مادەني - گۋمانيتارلىق بايلانىستاردى، سونىڭ ىشىندە ءبىلىم بەرۋ جانە تۋريستىك كلاستەردى دامىتۋ تاجىريبەسىن الماسۋ بويىنشا ىنتىماقتاستىقتى نىعايتۋ ماسەلەلەرىن تالقىلادى.

قازاقستاننىڭ تاۋەلسىزدىك جىلدارى ەكى ەل اراسىندا بارلىق باعىتتار سپەكتەرلەرى بويىنشا سەرىكتەستىك قاتىناستارى ورنىقتى. بۇگىنگى كۇنى الماتىدا فرانسۋز كاپيتالىمەن ساۋدا، تاماق ونەركاسىبى، كولىك پەن تەلەكوممۋنيكاسيا سالالارى بويىنشا 60-تان استام كاسىپورىن جۇمىس ىستەيدى. الماتى مەن فرانسيا اراسىنداعى تاۋار اينالىمى بيىلعى جىلدىڭ ءبىرىنشى توقسانىندا 13%-عا ءوسىپ، وڭ ديناميكا قالىپتاستى. بۇلاردان وزگە، مەگاپوليستە فرانسيا مادەنيەتى مەن ونەرىنە قاتىستى ءتۇرلى شارالار قالا تۇرعىندارى اراسىندا ءجيى ءوتىپ تۇرادى.

كەزدەسۋ بارىسىندا پەر كابارە ەكى مەملەكەت پەن ەكى ەل اراسىنداعى ىنتىماقتاستىقتىڭ ەڭ الدىمەن سەنىم مەن دوستىققا نەگىزدەلگەنىن اتاپ ءوتتى.

«بۇل مەنىڭ الماتىعا العاش كەلۋىم، بايقاعانىم قالا زاماناۋي ترەندتەر مەن جاڭا تەحنولوگيالار اكسەنتى بويىنشا دامۋ ۇستىندە ەكەن. تاۋلاردىڭ تىم جاقىن ورنالاسۋى - الماتىنىڭ تۋريستىك تارتىمدىلىعىنىڭ تاپتىرماس ارتىقشىلىعى. وسى باعىتتى دامىتۋدا فرانسۋز كومپانيالارىنىڭ تاجريبەسى مول، ال بۇل ەكى جاقتى بايلانىستى ودان ءارى نىعايتۋدىڭ تاعى ءبىر سالاسى»، - دەدى ۇلتتىق اسسامبلەيا دەپۋتاتى.

ايتا كەتەرلىگى، قازىرگى كەزدە الماتىدا «اليانس فرانسەز» وكىلدىگى بار. اباي اتىنداعى ۇلتتىق پەداگوگيكالىق ۋنيۆەرسيتەتتە ورتا ازياداعى العاشقى «سوربوننا-قازاقستان» ينستيتۋتى جۇمىس ىستەۋدە. 2016 جىلى فرانسيا استاناسى پاريجدە يۋنەسكو اياسىندا الماتىنىڭ 1000 جىلدىعى مەرەكەلەندى. الماتى مەن رەنن قالالارى باۋىرلاستىعىنىڭ 25 جىلدىعى قۇرمەتىنە فرانسۋز قالاسىندا ابايدىڭ ءبيۋستى اشىلدى. الماتىدا كۇزدە «سيفرلى كۇز» فەستيۆالىن وتكىزۋ جسوپارلانعان، مۇندا قالا تۇرعىندارى مەن قوناقتارى سيفرلى تەحنولوگيالار ارقىلى فرانسۋز مادەنيەتىمەن جانە ونەرىمەن تانىساتىن بولادى.