«الماتىنىڭ 50 جوبالار-درايۆەرلەرى» باستاماسى اياسىندا مەگاپوليستىڭ يندۋستريالدى ايماعىندا «Tokyo Rope Manufacturing» ترانسۇلتتىق كورپوراسياسىنىڭ ينجەنەرلىك جۇيەلەردى قورعايتىن ءونىم شىعاراتىن جاڭا زاۋىتى تەحنيكالىق تۇرعىدا اشىلدى. كاسىپورىننىڭ تمد-دا بالاماسى جوق جانە جاپوندىق ينۆەستيسيا ەسەبىنەن سالىندى.

مەگاپوليس اكىمى باۋىرجان بايبەك جوعارى تەحنولوگيالى زاۋىتتىڭ ەل پرەزيدەنتى نۇرسۇلتان نازاربايەۆتىڭ شەتەلدىك ينۆەستيسيانى تارتۋ جانە رەسپبۋليكا ايماعىندا يننوۆاسيالىق ءوندىرىس قۇرۋ جونىندەگى تاپسىرماسىن ورىنداۋ اياسىندا اشىلعانىن اتاپ ءوتتى.

جاڭا كاسىپورىندا بۇرعىلايتىن انكەرلەر، جوعارى ءتوزىمدى مەتالل ارقاندار، تاۋ جانە كارەرلەردە قولدانىلاتىن بولات تورلار شىعاراتىن جانە تەحنيكالىق پارامەترى جاعىنان وتە قۇندى جابدىقتار ورناتىلعان. زاۋىتتىڭ قۋاتى جوعارى، جىلىنا 17 مىڭ توننادان استام بولات ونىمدەرىن شىعارادى.

«Tokyo Rope Manufacturing» ديرەكتورلار كەڭەسىنىڭ ءتوراعاسى شيگەتو تاناكا الماتىنىڭ بارلىق وڭىرلەرگە وزىق جاپون تەحنولوگياسىن تاراتۋدىڭ قۇندى نۇكتەسى بولعانىن اتاپ ءوتتى.

«2016 جىلى جوبانىڭ العاشقى فازاسى جۇزەگە اسىپ، «Tokyo Rope Almaty» زاۋىتىنىڭ ونىمدەرى تمد ەلدەرى مەن پارسى شىعاناعىندا، سونىڭ ىشىندە ساۋد ارابياسىنىڭ ءىرى جوبالارىندا قولدانىلا باستادى. الماتى زاۋىتىنىڭ شاعىن ونىمدەرى ەسەنتاي وزەنى جاعالاۋىنىڭ، ۇلكەن الماتى وزەنىنە دەيىنگى اۆتوجولداردى، مەدەۋ - شىمبۇلاق اسپالى جول مەن «مىڭجىلقى» پلاتيناسىنىڭ بەرىكتىگىن ارتتىرۋدا پايدالانىلدى. مەن بۇگىنگى بىرىگىپ اتقارىلعان جۇمىستىڭ قازاقستانعا جاپوندىق ينۆەستيسيانىڭ جاڭا لەگىنىڭ كەلۋىنە سەرپىن بەرەتىندىگىنە سەنىمدىمىن»، - دەدى شيگەتو تاناكا.

جاپوندىق كومپانيا 130 جىلدان استام بۇرىن قۇرىلعان جانە بولات ارقاندارىن شىعارۋدا الەمدىك جەتەكشى بولىپ تابىلادى. «Tokyo Rope» سەلگە، تاس، لاي كوشكىندەرىنە قارسى تۇراتىن جابدىقتار مەن قۇرىلعىلار دا شىعارادى. جاپون فيرماسىنىڭ بولات ارقاندارى الەمدەگى 20 ءىرى كوپىردىڭ 12ء-سىنىڭ قۇرىلىسىندا قولدانىلدى. جاپونيادا شىعاتىن ءاربىر ءتورتىنشى اۆتوشيندە Tokyo Rope ونىمدەرى بار. بۇلاردان وزگە كومپانيا جەدەل ليفتەر مەن ينجەنەرلىك قورعانىس ءوندىرىسى ءۇشىن جوعارى ساپالى ارقاندار شىعارۋمەن دە تانىمال.

«جالپى، الماتىنىڭ يندۋستريالدى ايماعىندا قازىرگى كەزدە قۇرىلىس، فارماسيەۆتيكا، حيميا، تاماق جانە جەڭىل ونەركاسىبى سالالارى بويىنشا 40-تان استام ءىرى وتاندىق جانە شەتەلدىك جوبالالار جۇزەگە اسۋدا. بيىلعى جىلى 9 جاڭا جوبا ەنگىزۋ جوسپارلانعان، سونىڭ ىشىندە كابەل وتكىزگىش ونىمدەرىن شىعاراتىن رەسەيلىك «كمك Investment» كومپانياسى، مۇناي، گاز سۋ جانە مۇناي ونىمدەرىن تاسىمالداۋ ءۇشىن ۇلكەن ديامەترلى بولات قۇبىرلار وندىرەتىن قازاقستاندىق - قىتايلىق «Asia Steel Pipe Corporation» كاسىپورنى بار»، - دەدى الماتى اكىمدىگىنىڭ باسپا ءسوز قىزمەتى.