الماتىدا ق ر مەملەكەتتىك رامىزدەرى كۇنى تويلانىپ جاتىر. الماتى اكىمى باۋىرجان بايبەك قازاقستانننىڭ مەملەكەتتىك رامىزدەرى وتانىمىزدىڭ تاريحى مەن ءداستۇرىن جانە حالقىمىزدىڭ قايتالانباس ەرەكشەلىگى مەن ۇلىلىعىن پاش ەتەتىنىن اتاپ ءوتتى.
«تاۋەلسىزدىكتىڭ العاشقى كۇنىنەن باستاپ پرەزيدەنتتىڭ بارلىق باعدارلامالارى مەن رەفورمالارى قاراپايىم قازاقستاندىقتارعا، ەڭ الدىمەن جاستارعا باعىتتالدى. بيىلعى جىلى جاريالانعان ەلباسىنىڭ بەس الەۋمەتتىك باستاماسى جاس وتباسىلاردىڭ تۇرعىن ءۇي جاعدايىن جاقسارتۋعا، ستۋدەنتتىك جاتاقحانالار ماسەلەسىن شەشۋگە، ساپالى جوعارى ءبىلىم الۋعا كەڭ مۇمكىندىك بەرەدى. وسىناۋ بازالىق باستى نەگىزدەر ءاربىر جاس ادامنىڭ ءوز الەۋەتىن جۇزەگە اسىرۋعا، تابىسقا جەتۋىنە جول اشادى»، - دەدى قالا باسشىسى.
ايتا كەتۋ كەرەك، بيىل قالادا جاستارعا ارنالعان قالالىق «الماتى جاستارى» تۇرعىن ءۇي باعدارلاماسى ودان ءارى جالعاساتىن بولادى. باسپانالار جاس وتباسىلارعا العاشقى جارناسىز 5% نەسيەمەن بەرىلەدى. ول ءۇشىن جەرگىلىكتى بيۋدجەتتەن 2 ملرد تەڭگە ءبولىندى. 3 مىڭعا جۋىق بالانى مەكتەپكە دەيىنگى بىلىممەن قامتۋ ءۇشىن جەكە بالاباقشالارعا مەملەكەتتىك تاپسىرىس ۇلعايدى. وعان 850 ملن تەڭگە ءبولىندى. قارت ادامداردى بەلسەندى ومىرگە تارتۋ ءۇشىن اعا ۇرپاققا ارنالعان «بەلسەندى ۇزاق ءومىر» ارنايى باعدارلاماسى جاسالدى.
مەملەكەتتىك رامىزدەر كۇنى قۇرمەتىنە «حالىق ارەنا» مۇز كەشەنىنىڭ ساحناسىندا اسكەري وركەسترلەر ۇجىمدارى مەن قازاق ەستراداسى جۇلدىزدارى، سونىڭ ىشىندە روزا رىمبايەۆا، التىناي جورابايەۆا، ءالي وقاپوۆ جانە باسقالارى ونەر كورسەتتى.
سونىمەن قاتار، بۇگىن پانفيلوۆ كوشەسى بويىمەن اباي اتىنداعى وپەرا جانە بالەت تەاترىنان جىبەك جولى كوشەسىنە دەيىن وركەسترلەردىڭ مەرەكەلىك شەرۋى وتەتىنى جوسپارلانعان.
