الماتىداعى پەدياتريا جانە بالالار حيرۋرگياسى عىلىمي ورتالىعىندا وزىق قوندىرعىلارمەن جابدىقتالعان «Smart School» وقۋ سىنىبى اشىلدى.
ورتالىقتا بۇگىنگى كۇنى 100-دەن استام بالا ەم الۋدا. يننوۆاسيالىق وقۋ بولمەسى اسىرەسە، ونكولوگيالىق دەرتكە شالدىققان بالالارعا وڭ اسەرىن تيگىزەتىنى كورشى رەسەي تاجىريبەسىنەن بەلگىلى.
ورتالىق ديرەكتورى ريزا بورانبايەۆانىڭ ايتۋىنشا، سمارت-سىنىپ بالالاردىڭ ەمىن ۇزبەستەن بىلىمدەرىن ارتتىرۋعا، شىعارماشىلىق جاعىنان دامىتۋعا مۇمكىندىك بەرەدى.
«بۇعان دەيىن كىشكەنتاي پاسيەنتتەرىمىز بارلىق پاندەر بويىنشا پالاتالارىندا ءبىلىم السا، ەندى بىلىمدەرىن وسى سىنىپتا جالعاستىرىپ، بوس ۋاقىتتارىن قىزىقتى دا ءتيىمدى وتكىزەتىن بولادى. ەرتەڭنەن باستاپ سۋرەت سالۋ، كونسترۋكتور قۇراۋ، اعىلشىن ءتىلىن ۇيرەنۋ، شاحمات ۇيىرمەلەرى جۇمىسىن باستايدى. بۇل ءوز كەزەگىندە بالالاردىڭ تەزىرەك جازىلىپ، ساۋىعىپ كەتۋىنە وڭ اسەرىن تيگىزەدى دەپ سەنەمىز»، - دەدى ريزا بورانبايەۆا.
ونىڭ ايتۋىنشا، بۇل سىنىپتا مۋزىكا مەن ەرتەگىلەردىڭ كومەگىمەن تەراپيا سەانستارى وتكىزىلەدى. ورتالىققا كەلىپ ءدارىس بەرەتىن مۇعالىمدەر، ساباقتاردى ءتيىمدى جانە قىزىقتى ەتىپ ونلاين-رەجىمدە دە جۇرگىزە الادى. ونلاين تۇرىندە وتەتىن ساباقتارعا ەندى توسەككە تاڭىلعان بالالار دا قاتىسا الاتىن بولادى.
