قازاقستاننىڭ سىرتقى ىستەر مينيسترلىگى يراندا دەرەكتى كينو ءتۇسىرىپ جۇرگەن قازاقستاندىق رەجيسسەر، سەناريست ءارى وپەراتور قانات بەيسەكەيەۆ ۇستالدى دەگەن اقپاراتقا قاتىستى پىكىر ءبىلدىردى، - دەپ حابارلايدى Qamshy.kz اقپارات اگەنتتىگى Tengrinews.kz - كە سىلتەمە جاساپ.

"بيىلعى 16 ماۋسىمدا قازاقستاننىڭ گورگان قالاسىنداعى باس كونسۋلدىعى ءۇش ادامنان تۇراتىن قازاقستاندىق ءتۇسىرىلىم توبىمەن كەزدەسۋى كەزىندە يراندا ءتۇسىرىلىم جاساۋعا ارناۋلى ۆيزاسىنىڭ بولماعانىن انىقتاپ، جەرگىلىكتى بيلىكتەن وسى قۇجاتتى الۋدى كەڭەس ەتتى. باس كونسۋلدىقتىڭ مالىمەتىنشە، ءتۇسىرىلىم توبى قازاقستانعا ۇشۋ ءۇشىن تەگەرانعا اتتانعانى انىقتالدى. قانات بەيسەكەيەۆ ءتۇسىرىلىم جاساۋعا ارنايى رۇقساتتى الۋدا كونسۋلدىق مەكەمەسىنىڭ قولعابىس ەتۋىنەن ۋاقىتىنىڭ تاپشىلىعىنا بايلانىستى باس تارتتى. الايدا 20 ماۋسىمدا ءتۇسىرىلىم توبى گورگان قالاسىنا ورالىپ، ءتۇسىرىلىمىن جالعاستىرعان، مۇندا جەرگىلىكتى كوشى-قون ورگاندارى تۇسىرىلىمگە رۇقساتىنىڭ بولماۋىنا بايلانىستى ولاردان تەگەرانعا ورالۋىن سۇراعان"، - دەلىنگەن ۆەدومستۆو حابارلاماسىندا.

يرانداعى دەمالىس كۇندەرىنە قاراماستان باس كونسۋلدىقتىڭ ءتۇسىرىلىم توبىنىڭ قايدا ەكەنىن انىقتاۋ ءۇشىن جەرگىلىكتى بيلىكپەن بايلانىس ورناتۋعا تىرىسىپ جاتقانى ايتىلادى. باس كونسۋلدىق وسى ماسەلە بويىنشا يراننىڭ سىرتقى ىستەر مينيسترلىگىنە ارنايى نوتا جولداعان.

ەسكە سالايىق، مۇنىڭ الدىندا PR-مامان الىشەر ەلىكبايەۆ يراندا دەرەكتى كينو ءتۇسىرىپ جۇرگەن قازاقستاندىق رەجيسسەر، سەناريست ءارى وپەراتور قانات بەيسەكەيەۆتىڭ ۇستالعانىن حابارلاعان ەدى. 

"ول بۇل ەلدە فيلم ءتۇسىرىپ جاتىر. ەندى يرانداعى قازاقتار تۋرالى فيلم شىعا ما، جوق پا - بەلگىسىز. سول جاقتا جۇرگەنىنە ءبىراز ۋاقىت بولدى. ەندى عانا ەستىپ وتىرمىن. جاعدايدىڭ ءمان-جايىن بىلمەيمىن.  بۇعان دەيىن ول موڭعولياداعى قازاقتار تۋرالى فيلم تۇسىرگەن، كەيىن وزبەكستانعا بارىپ، سونداعى قازاقتار جايلى فيلم ءتۇسىردى، ەندى يرانعا بارعان"، - دەدى الىشەر ەلىكبايەۆ.

ونىڭ ايتۋىنشا، بەيسەكەيەۆتەن بىرنەشە مىڭ دوللار تۇراتىن قۇرال-جابدىعى تاركىلەنگەن.