قازاقستان شەتەلدەن شاقىرۋدى راسىمدەۋ جانە ۆيزا بەرۋ ءتارتىبىن جەڭىلدەتەدى. بۇل تۋرالى ق ر ءىىم حابارلادى. قولدانىستاعى ەرەجەگە ەنگىزىلگەن ءتيىستى وزگەرىستەر 1 شىلدەدەن باستاپ كۇشىنە ەنبەك.

«قازاقستانعا كەلەتىن شەتەلدىكتەردىڭ شاقىرۋ قاعازدارىن تاپسىرۋ مەرزىمى قىسقارتىلدى. قازاقستان رەسپۋبليكاسىنا كەلۋگە شاقىرۋ ۆيزانى الۋشىنىڭ بولجامدى كەلۋ كۇنىنەە كەمىندە 5 جۇمىس كۇنى بۇرىن بەرىلۋى ءتيىس. بۇعان دەيىن ول مەرزىم 14 كۇن بولاتىن»، - دەگەن ءىىم اقپاراتىنان ءۇزىندى كەلتىرىلگەن.

مينيسترلىكتىڭ حابارلاۋىنشا، شاقىرۋدا كەلەتىن ادامنىڭ تۇراتىن جەرى مەن قوزعالىس باعىتتارى كورسەتىلگەندىكتەن، ۆيزا العان شەتەلدىك ازاماتقا كوشى-قون ورگاندارىندا تىركەۋدە تۇرۋ قاجەت ەمەس.

قازىرگى كەزدە قازاقستانعا ونداعان مەملەكەتتىڭ ازاماتتارى ۆيزاسى كەلە الادى. ەۋروپا وداعى ەلدەرى، ەكونوميكالىق ىنتىماقتاستىق جانە دامۋ ۇيىمىنە كىرەتىن ەلدەردىڭ، بىرىككەن اراب امىرلىكتەرى، مالايزيا، موناكو مەن سينگاپۋر ازاماتتارىنا قازاقستانعا 14 كۇنگە دەيىنگى مەرزىمگە ۆيزاسىز كەلۋلەرىنە بولادى. اقش ازاماتتارى قازاقستان تەرريتورياسىندا 30 كۇن ۆيزاسىز ءجۇرىپ-تۇرا الادى.