الماتى قالاسىنداعى  № 45 كىتاپحانادا «ەل-شەجىرە» قوعامدىق قورى الماتى قالاسى ىشكى ساياسات باسقارماسىمەن بىرلەسە وتىرىپ، ق ر ۇلتتىق مەملەكەتتىك كىتاپ پالاتاسىنىڭ ديرەكتورى الىبەك اسقاروۆپەن كەزدەسۋ وتكىزدى. جيىن استانانىڭ 20 جىلدىعىنا وراي ۇيىمداستىرىلدى.

كەزدەسۋدىڭ باستى ماقساتى – استانانىڭ ەلىمىزدىڭ دامۋىنا قوسقان ۇلەسى مەن اتقارىلعان ىستەرىن بارلىق بۋىن وكىلدەرىنە تىڭعىلىقتى ءتۇسىندىرۋ.

تىڭ يدەيالاردى، جاڭا عىلىمي شەشىمدەر مەن ساۋلەت ونەرىنىڭ وزىق ۇلگىلەرىن ومىرگە اكەلگەن استانانىڭ 20 جىلدىعى حالىقارالىق دەڭگەيدەگى ايتۋلى وقيعا. وسى ورايدا الىبەك اسقاروۆ جاس قالانىڭ ەكى ون جىلدىقتاعى قالىپتاسۋ جانە قارىشتى دامۋ كەزەڭى حاقىنداعى وي-تولعانىسىن ورتاعا سالدى. سونداي-اق، بىرلىك پەن كەلىسىمنىڭ جالپى ۇلتتىق ۇلگىسى بولا العاندىعىن، بۇگىندە حالقى ءبىر ميلليوننان اساتىن الىپ قالاعا اينالعاندىعىن اڭگىمەگە ارقاۋ ەتتى. ول «قازاقستاننىڭ قازىرگى زامانعا لايىق جاڭا استاناسىن سالۋ يدەياسى مەملەكەت باسشىسى نۇرسۇلتان نازاربايەۆقا تيەسىلى ەكەنى ءمالىم. ەلباسىنىڭ وسىنداي باتىل قادامعا بارۋىنا ءتۇرلى فاكتور سەبەپ بولدى. ەڭ باستىسى ەلىمىزدىڭ ەكونوميكالىق جانە گەوساياسي مۇددەسىنە بايلانىستى ەدى. استانا ەل اۋماعى ورتاسىندا ورنالاسىپ، ەۋروپا مەن ازيانى جالعاستىراتىن التىن كوپىر. بۇرىنعى مەن قازىرگى قالانى ەش سالىستىرۋعا بولمايدى. ەلوردانى الىپ قالا ەتىپ قالىپتاستىرۋعا ءبىر ەمەس، بىرنەشە جىلدار كەتتى. قوماقتى قارجى قۇيىلىپ، كوپ كۇش جۇمسالدى. بۇگىندە استانا –جەدەل قارقىنمەن دامىپ كەلە جاتقان زاماناۋي قالا. ونى بۇكىل الەم مويىنداپ وتىر» -دەدى.

بۇعان قوسا، « سول كەزدىڭ وزىندە ۇيلەر قىمباتتاۋ ەدى. 2-شىلدە كۇنى كوشىپ باردىق. قالانىڭ ىشىنە كىرگەندە «ءبىز قايدا كەلدىك؟مىنا جەردى استانا جاساعانشا قاي زامان؟» -دەگەن كۇدىك سانامىزدا سايراپ تۇردى. سول كۇنى اسپان اشىق بولسا دا، جىلى جاڭبىر قۇيىپ جاۋدى. «اللانىڭ نۇرى جاۋدى»– دەپ  جاقسىلىققا بالادىق. ال باسقا مينيسترلىكتەر مەن پرەزيدەنت اكىمشىلىگى 10 جەلتوقساندا 6 ايدى ارتقا تاستاپ بىزدەن كەيىن ات باسىن بۇردى. وسىلايشا العاش بىزدەر كوشىپ بارعان بولاتىنبىز. مىنە بۇگىندە كۇدىگىمىز سەيىلىپ، ۇكىلەگەن ءۇمىتىمىز اقتالدى. شەت ەلدەرمەن تەرەزەمىز تەڭەسىپ، اسىعىمىز الشىسىنان ءتۇستى. 20 جىل بۇرىنعا شەشىمىمىزدىڭ دۇرىس بولعانىنا قازىرگى ۋااقىتتا شۇكىرلىك ايتامىز. استانا – ەۋرازيانىڭ ءدال كىندىگىندە ورنالاسقان اسەم شاھارلاردىڭ ءبىرى ءارى بىرەگەيى»- دەپ الىبەك اسقاروۆ ءوز ءسوزىن ادەمى ەستەلىكتەرىمەن اياقتادى.