"دوستار! اقىرى جۇزەگە استى. ءبىز بۇل ءساتتى ۇزاق توستىق. قازاقستان رەسپۋبليكاسى ۇكىمەتىنىڭ №381 قاۋلىسىمەن 2018 جىلدىڭ 27 ماۋسىمىنان باستاپ، ەرەكشە قورعالاتىن تابيعي اۋماقتار جۇيەسىندە كوپتەن كۇتكەن رەزەرۆات دۇنيەگە كەلدى"، – دەپ جازدى ساكەن دىلداحمەت ءوزىنىڭ Facebook پاراقشاسىندا.
رەزەرۆات اۋماعى 415 مىڭ گەكتار. بۇل قازاقستانداعى التىنشى قورىق بولادى.
ىلە-بالقاش رەزەرۆاتىندا جولبارىستار وسىرىلمەك.
ايتا كەتەيىك، 2017 جىلدىڭ جەلتوقسانىندا ماجىلىستە قازاقستانعا امۋر جولبارىسىن جەرسىندىرۋ يدەياسى تالقىلانعان ەدى. دەپۋتاتتار ىلە-بالقاش رەزەرۆاتىنا جولبارىس اكەلۋگە بولا ما، جەرگىلىكتى حالىقتىڭ مال-جانىنا ءقاۋىپسىز بە، جوبا تىم قىمبات ەمەس پە دەگەن نارسەلەرگە باس قاتىرعان.
ق ر اشم ورمان شارۋاشىلىعى جانە جانۋارلار دۇنيەسى كوميتەتىنىڭ ءتوراعاسى قىزمەتىن اتقارۋشى مارلەن اينابەكوۆتىڭ ايتۋىنشا، الداعى بەس جىلدا وسىمدىكتەردى قالپىنا كەلتىرۋ جۇمىسى جۇرگىزىلەدى. سودان كەيىن ەلىك پەن قاباننىڭ سانىن كوبەيتەدى.
"ءبىز بىردەن 100 جولبارىس اكەپ جىبەرە سالمايمىز. اۋەلى بارلىق جاعدايدى جاساپ الامىز"، - دەدى اينابەكوۆ.
ونىڭ سوزىنشە، قيىر شىعىستا ءبىر جولبارىس تۋريزم سالاسىنا 1 ملن دوللار پايدا تۇسىرەدى ەكەن. سوندىقتان بۇل جوبا ءوزىن اقتايدى.
اشم مالىمەتى بويىنشا ءقازىر الەمدە 3900 باس جولبارىس قالعان.
