جاڭا زەلانديانىڭ تۇرعىنى كلەر نەلسون ساياحات جاساۋدى جاقسى كورەتىن.

وسى جولى ول جالعىز ءوزى ءشول دالادان تۇراتىن پاركتى ءجۇرىپ ءوتۋدى ءجون سانايدى. ءبىر ايتا كەتەرلىگى، بۇل ءبىرىنشى تاجىريبەسى ەمەستىن. الايدا سول كۇنى كۇتپەگەن جاعدايلار ورىن الىپ، كلەر ساۋ باسىنا ساقينا تىلەپ الادى. بۇل جۇمسارتىپ ايتقانىمىز بولار. 

جولعا شىعىسىمەن-اق ۇلكەن بيىك تاسقا شىعامىن دەپ اياعىن جاراقاتتاپ العان ول 4 كۇن ءىس-قيمىلسىز جاتادى. ىشەتىن سۋى دا تاۋسىلعان كلەر كوڭىل-كۇيدى تۇسىرمەي، ءوزىن بارىنشا سابىرعا شاقىرۋمەن بولادى. سومكەسىندە جۇرگەن ءاسپيريندى ءىشىپ الىپ، ىسكە كوشەدى. ەڭ بىرىنشىدەن، وزىمەن بىرگە جولعا الىپ شىققان پوليەتيلەندى پاكەتتەر ارقىلى كۇننەن قورعانىش بولار كولەڭكە جاسايدى. كولەڭكەنىڭ استىندا وتىرىپ تاڭەرتەڭ-كۇندىز دەمالسا، كەشكە-تۇندە تاماعىن جىرتىپ كومەك سۇراۋمەن ۋاقىت وتكىزەدى. كۇننەن قورعايتىن كرەمنىڭ قۇتىسىنا ءوز ءزارىن جيناپ، سونى ىشەدى. BBC جۋرناليستەرىنە كەيىن سۇحبات بەرگەن كلەر بۇل قادامعا امال جوقتىقتان بارعانىن ءارى ءزاردىڭ ءدامى جامان سىراعا ۇقساس ەكەنىن ايتىپ بەرەدى. ءتورتىنشى كۇنى اسپاندا ۇشىپ بارا جاتقان تىكۇشاقتىڭ شۋىن ەستيگەن كلەر قولىنداعى تاياققا كيىم بايلاپ، ونى  جالاۋ سياقتى جەلبىرەتەدى. سونىڭ ارقاسىندا ونى قۇتقارۋشىلار بايقاپ قالادى. 

ءوزىنىڭ ەرىك-جىگەرى ارقاسىندا ءتىرى قالعان كلەر نەلسون قۇتقارۋشىلاردى دا تاڭ قالدىرىپتى. 4 كۇن بويى اسسىز، سۋسىز قالعان ايەل كەلگەن كومەككە ريزا بولىپ، جىلاپ-سىقتاۋدىڭ ورنىنا كۇلىپ ماز-مەيرام بولعان دەسەدى. قازىرگى تاڭدا قايسار مىنەزدى كلەر جەرگىلىكتى اۋرۋحانادا ەم قابىلداپ، اياققا تۇرىپ ءجۇرۋدى قايتادان ۇيرەنىپ جاتىر.

ساياحات جاساۋدى جاساۋدى جاقسى كورەتىن جيھانكەزدەرگە كلەر نەلسون مىنانداي اقىل-كەڭەس ايتىپتى: «كەز كەلگەن جورىققا تىڭعىلىقتى دايىندالۋ قاجەت ەكەن. جاي عانا ۇيالى تەلەفونعا سەنىم ارتۋدىڭ قاجەتى جوق. ەگەر دە سۋسىز قالساڭىز، ونى بارىنشا ۇنەمدەۋگە تىرىسىڭىز. بوتەلكەدەن ىشكەنشە شۇبەرەكتى سۋلى ەتىپ سونى سورىڭىز. جانە ەڭ باستىسى كەز كەلگەن جاعدايدا كوڭىل-كۇيىڭىزدى تۇسىرمەڭىز».

جازيرا بايدالى