اكەجان قاجىگەلدين كەلەسى پرەزيدەنت سايلاۋىنا قاتىسپايتىنىن ايتقان، دەپ حابارلايدى Qamshy.kz اقپارات اگەنتتىگى. بۇل تۋرالى بۇگىن «جاڭا قازاقستان» فورۋمىنىڭ باسپا ءسوز ءماسليحاتى بارىسىندا ساياساتكەر دوس كوشىم مالىمدەدى.

– «مەنىڭ ۇلكەن قاتەلىكتەر جاساعان كەزىم بولدى» دەپ قاجىگەلدين ءوزىنىڭ وكىنىشىن ءبىلدىردى. مەن وعان سىيلاستىقپەن قارادىم. «ءبىز دەموكراتيانىڭ تۋىن ۇستاپ كەتەتىن ادام ەمەسپىز. جاسىم 65-كە  كەلدى. وسىندا وتىرىپ قازاقستاننىڭ  جاعدايىن جاقسارتۋعا، كونستيتۋسيانى جاڭارتۋعا، وزگەرتۋگە شامام كەلگەنشە كومەكتەسەيىن، ءبىراق ليدەر بولمايمىن» دەپ اشىعىن ايتتى»، - دەدى دوس كوشىم قاجىگەلدينمەن وڭاشا اڭگىمەلەسكەن ءساتىن ەسكە ءتۇسىرىپ.

دوس كوشىمنىڭ ايتۋىنشا، اكەجان قاجىگەلدين «جاڭا قازاقستاننىڭ» ءبىر مۇشەسى بولىپ قالا بەرمەك، الايدا ەلگە قايتار ويى جوق.

ايتا كەتەيىك، بۇگىن "جاڭا قازاقستان" فورۋمى باسپا ءسوز ءماسليحاتىن وتكىزدى. جيىن بارىسىندا ساياساتكەرلەر ۆاشينگتونعا ساپارلارىنىڭ ناتيجەسىن ايتىپ، جۋرناليستەردىڭ ساۋالدارىنا جاۋاپ بەردى.