الماتى قالاسىنداعى ا.پ.چەحوۆ اتىنداعى كىتاپحانادا استانانىڭ 20 جىلدىعىنا وراي ساياساتتانۋشى راسۋل جۇمالىمەن كەزدەسۋ ءوتتى. جيىندى الماتى قالاسى ىشكى ساياسات باسقارماسىنىڭ تاپسىرىسىمەن «ەل-شەجىرە» قوعامدىق قورى ۇيىمداستىردى.

ءىس-شارانىڭ باستى ماقساتى –استانا الەمدىك ساياسي شەشىمدەردىڭ ورتالىعى بولا العاندىعىن جاستارعا جانە قالا تۇرعىندارىنا ءتۇسىندىرۋ. ەلوردانى اۋىستىرۋ ساياسي داعدارىستىڭ الدىن الۋعا ارنايى جاسالعاندىعى جايىندا جۇيەلەپ جەتكىزۋ.

كەزدەسۋدە راسۋل جۇمالى استانانىڭ ىشكى، سىرتقى ساياساتىن سالماقتاپ، ورامدى ويلارىمەن ءبولىستى. سونداي-اق، «26 جىلدىق ەگەمەندى ەلىمىزدىڭ  تاۋەلسىزدىك تاريحىندا ەڭ ءبىر تۇشىمدى، ناتيجەلى ۇلتتىق جوباسى وسى استانامىزدى اۋىستىرۋ بولدى. مۇنى ۇلكەن جەتىستىك رەتىندە قابىلدايمىن. 1998 جىلدىڭ باسىندا ءبىز استاناعا كوشتىك. ول كەزدە ناعىز ورىستاردىڭ قالاسى بولاتىن. قازاقستان دەگەن اتاۋى عانا بولماسا، كادىمگى رەسەيدىڭ ءبىر پروۆينسياسىندا جۇرگەندەي كۇي كەشەتىنسىڭ. ال ءقازىر شە؟ بۇرىنعىدان ايىرماشىلىعى، ارتىقشىلىعى وتە كوپ. بارلىعىن قازاقىلاندىرىپ ناعىز لايىقتى ەلورداعا اينالدى. ءتىپتى جان-جاعىنداعى وڭىرلەرگە دە اسەرى ءتيدى. ۇلتتىق ۇستانىم، ءسالت-داستۇر، ادەت-عۇرىپ قالىپتاستى»، – دەپ وتكەنىڭ ەسكە الىپ، بۇگىنگە شۇكىرلىك ايتتى. بۇعان قوسا، ساياساتتانۋشى ەلىمىزدىڭ سىندارلى، سالماقتى ساياساتىنا توقتالدى. الەم ەلدەرى مەن ءوز مەملەكەتىمىزدىڭ دامۋ قارقىنىن، مارتەبەسىن، مۇمكىندىكتەرىن سالىستىردى. بۇگىندە دامۋ جولىندا جۇرسەكتە، باسەكەگە ءتۇسىپ، يىق تىرەستىرە الاتىن دەڭگەيدە ەكەنىمىزدى ەرەكشە اتاپ ءوتتى. سونىمەن قاتار، استانانى كوشىرۋ –قازاق تاريحىنداعى ەلەۋلى وقيعانىڭ، ماڭىزدى شەشىمنىڭ بىرەگەيى ەكەنىڭ تاعى دا ەسكە سالدى.

كەزدەسۋ سوڭىندا قالا قوناقتارى مەن ستۋدەنتتەر كوكەيىندەگى سۇراقتارىن قويىپ، اڭگىمەنى ادەمى ءوربىتتى. سونىمەن قاتار، «ەل-شەجىرە» قوعامدىق قورى اتىنان ا.پ.چەحوۆ اتىنداعى كىتاپحاناعا، راسۋل جۇمالىعا «الاشوردا فوتوالبومى» اتتى كىتاپ سىيعا بەرىلدى.