ماۋسىم ايىندا 8،7 ملرد تەڭگەدەن استام ساقتاندىرۋ جارناسى اۋدارىلدى، دەپ حابارلايدى Qamshy.kz اقپارات اگەنتتىگى مسق باسپا ءسوز قىزمەتىنە سىلتەمە جاساپ.

جۇيە ىسكە قوسىلعالى ءبىر جىل ىشىندە جەكە كاسىپكەرلەر مەن جۇمىس بەرۋشىلەر تولەگەن اۋدارىم سوماسى 80،6 ملرد تەڭگەدەن اسىپ جىعىلعان.

ونىڭ 72،1 ملرد تەڭگەسى (89،5% جۋىعى) جۇمىس بەرۋشىلەردىڭ قاراماعىنداعى جۇمىسكەرلەرى ءۇشىن جاساعان اۋدارىمدارى بولسا، قالعان 8،5 ملرد تەڭگە  (10،5% جۋىعى) – جەكە كاسىپكەرلەر مەن ازاماتتىق-قۇقىقتىق كەلىسىمشارت نەگىزىندە ەڭبەك ەتەتىن تۇلعالارعا تيەسىلى.

ايماقتىق تۇرعىدان العاندا، جارنا تولەۋ جاعىنان الماتى جانە استانا قالالارى مەن قاراعاندى وبلىسى كوش باستاپ تۇر.

ەستەرىڭىزگە سالا كەتسەك، جيناقتالعان قارجى ۇلتتىق بانكتە ساقتالادى. ەلىمىزدىڭ باس بانكىمەن قارجىنى سەنىمگەرلىك باسقارۋ تۋرالى كەلىسىم بەكىتىلگەن. تۇسكەن قاراجات ءمامس پاكەتى شەڭبەرىندەگى قىزمەتتەر اقىسىن تولەۋگە جۇمسالادى. قولدانىستاعى زاڭ بويىنشا، الەۋمەتتىك مەديسينالىق ساقتاندىرۋ شەڭبەرىندە قىزمەت كورسەتۋ 2020 جىلدان باستالۋى ءتيىس.