ەلوردا تىنىشتىعىن كۇزەتەتىن ساربازدار سانى تولىقتى. ۇلتتىق ۇلاننىڭ استانالىق قۇراماسىندا ەلىمىزدىڭ 14 وبلىسىنان شاقىرىلعان 800-گە جۋىق جاۋىنگەر انت قابىلدايدى. باس قالا ىرگەسىندەگى اسكەري قالاشىق اۋماعىندا جاس وتان قورعاۋشىلار ەلى مەن حالقىنا ادال قىزمەت ەتۋگە سەرت بەرمەك.

قىرىق كۇن بۇرىن 5573 اسكەري ءبولىمىنىڭ تابالدىرىعىن اتتاعان بۇل ساربازدار ارنايى دايىندىقتان ءوتىپ، ساپتىق ءجۇرىس پەن اسكەر ءىسىنىڭ قىر-سىرىن مەڭگەرىپ جاتىر. ەندى ءسال كۇندە قالامىزدىڭ قوعامدىق ءتارتىبىن، قالا تۇرعىندارى مەن قوناقتارىنىڭ تىنىشتىعىن كۇزەتەتىن بولادى. سونداي-اق، باس قالامىزدا وتەتىن بارلىق مادەني-كوپشىلىك، ساياسي-قوعامدىق، سپورتتىق شارالار مەن رەسمي باسقوسلار كەزىندە دە قاۋىپسىزدىكتى قامتاماسىز ەتۋ – وسى ۇلانداردىڭ ەنشىسىندە. ەلوردا ۇلاندارى شەتەلدىك دەلەگاسيالاردى قارسى الۋعا، تابيعي اپاتتار مەن توتەنشە جاعدايلاردا حالىققا كومەك كورسەتۋگە، داعدارىستى كيكىلجىڭدەردە ەلدى تىنىشتاندىرۋعا جۇمىلدىرىلادى.

وسىنداي جاۋاپتى مىندەت اتقاراتىن بولعاندىقتان جەدەل قۇراماعا جاڭادان قوسىلعان جاۋىنگەرلەر اعا بۋىن ساربازدار سەكىلدى ارنايى جاتتىعۋلار مەن دايىندىقتاردان، نۇسقاۋلىقتاردان وتكىزىلدى.

سالتاناتتى انت قابىلداۋ شاراسىنا ۇلتتىق ۇلان باس قولباسشىلىعى، مەملەكەتتىك ۆەدومستۆولار مەن كۇش قۇرىلىمدارىنىڭ باسشىلىقتارى، استانا قالاسى اكىمشىلىگىنىڭ جەتەكشىلەرى، سونداي-اق «نۇر وتان» پارتياسى مەن ءدىن وكىلدەرى، ارداگەرلەر مەن وقۋشىلار قاۋىمى جانە ساربازداردىڭ تۋعان-تۋىستارى قاتىساتىن بولادى. اسكەري ءبولىمنىڭ الىپ الاڭىنا ءبىر مەزگىلدە 5مىڭنان اسا ادام جينالىپ، جاس جاۋىنگەرلەردىڭ وتان قورعاۋشىلار قاتارىنا قوسىلۋىنا كۋا بوپ، سالتاناتتى شەرۋىن تاماشالايتىن بولادى. سونداي-اق، قوناقتار «اشىق ەسىك كۇنى» اياسىندا اسكەري ءومىردىڭ تىنىس-تىرشىلىگىمەن، ساربازداردىڭ تۇرمىسىمەن، اسكەري تەحنيكا جانە قارۋ-جاراق كورمەسىمەن، ۇلتتىق ۇلان ورتالىق مۋزەيىنىڭ مول مۇراسىمەن كەڭىنەن تانىسا الادى.