سالىنىپ جاتقان تۇرعىن ءۇي كولەمىنىڭ ۇلعايۋى جىلجىمايتىن مۇلىك نارىعىندا باعانىڭ تومەندەۋىنە وڭ اسەرىن تيگىزەدى دەپ حابارلايدى اتىراۋ قالاسى اكىمىنىڭ باسپا ءسوز قىزمەتى.

2018 جىلى وڭىردە 3892 پاتەرلىك 44 كوپ قاباتتى تۇرعىن ءۇيدىڭ قۇرىلىسى باستالدى، 34 ءۇي وسى جىلى پايدالانۋعا بەرىلەدى. وبلىس ورتالىعىندا 39 تۇرعىن ءۇيدىڭ قۇرىلىسى جۇرگىزىلۋدە، قالعاندارى – اۋدانداردا.

بۇل قازاقستاننىڭ تاۋەلسىزدىك جىلدارىنداعى تۇرعىن ءۇي قۇرىلىسى بويىنشا ەڭ جوعارعى كورسەتكىش بولىپ تابىلاتىنىن اتاپ ءوتۋ قاجەت.

اتىراۋ قالاسىنىڭ اكىمى اليمۇحاممەد قۇتتۇمۇرات ۇلى «بەرەكە» ىقشام اۋدانىنداعى تۇرعىن ءۇي قۇرىلىسىن تەكسەرىپ شىعىپ، قاراماعىنداعىلارعا ءبىرقاتار ناقتى تاپسىرمالار بەردى.

مۇنداي كوپ تۇرعىن ءۇيدىڭ قۇرىلىسى جەكە قۇرىلىس سالۋشىلار تاراپىنان قىزىعۋشىلىقتىڭ جوعارى بولۋىنىڭ ناتيجەسىندە مۇمكىن بولدى. وبلىس باسشىلىعىمەن ءوڭىردىڭ ينۆەستيسيالىق احۋالىن جاقسارتۋ بويىنشا ءبىرقاتار جۇمىستار اتقارىلدى، بۇل ءوز كەزەگىندە اتىراۋدا قۇرىلىس سالاسىندا سەرپىلىسىن تۋدىردى، - دەپ اتاپ ءوتتى اليمۇحاممەد قۇتتۇمۇرات ۇلى. – ءبىزدىڭ مىندەتىمىز ءوز قاراجاتىن تۇرعىن ءۇي قۇرىلىسىنا ينۆەستيسيالاعىسى كەلەتىندەر ءۇشىن مەيىلىنشە قولايلى جاعدايلار جاساۋ. بۇل ءوز كەزەگىندە يپوتەكالىق تۇرعىن ءۇي نارىعىندا باعانىڭ تومەندەۋىنە وڭ اسەرىن تيگىزەدى.