اتىراۋ وبلىسىنىڭ اكىمى نۇرلان نوعايەۆ فرانسيانىڭ قازاقستانداعى توتەنشە جانە وكىلەتتى ەلشىسى فيليپپ مارتينە باستاعان فرانسۋز دەلەگاسياسىمەن كەزدەستى.
سۇحباتتاسۋ الدىندا ءوڭىر باسشىسى فرانسۋز دەلەگاسياسىن فرانسيا قۇراماسىنىڭ رەسەيدەگى فۋتبولدان الەم چەمپيوناتىنداعى جەڭىسىمەن قۇتتىقتادى. سوڭعى رەت فرانسۋزدار الەم بىرىنشىلىگىندە 20 جىل بۇرىن – 1998 جىلى جەڭىپ شىققان ەدى.
نۇرلان نوعايەۆ اتاپ وتكەندەي، بۇگىنگى كۇنى اتىراۋ وبلىسى مەملەكەت باسشىسى قويعان ستراتەگيالىق مىندەتتەردى ىسكە اسىرۋداعى بەلسەندى جانە جۇيەلى ءىس-قيمىلداردىڭ ناتيجەسىندە سەرپىندى دامۋ ۇستىندەگى وڭىرلەردىڭ ءبىرى. وبلىستا ۇدەمەلى يندۋستريالىق-يننوۆاسيالىق دامۋ اياسىندا ءىرى اۋقىمدى ينۆەستيسيالىق جوبالار ىسكە اسىرىلۋدا. قازىرگى تاڭدا ءوڭىر ەكونوميكانى ءارتاراپتاندىرۋ ماقساتىندا باسقا باعىتتاردى – اگروونەركاسىپتىك كەشەندى، دەنساۋلىق ساقتاۋ، تۋريزم سالالارىن دامىتۋدا. – مەملەكەت باسشىسى نۇرسۇلتان نازاربايەۆتىڭ ەلىمىزگە شەتەلدىك ينۆەستيسيالاردى، جوعارى تەحنولوگيالاردى تارتۋ، پەرسونالداردى الەمدىك ستاندارتتار بويىنشا وقىتۋ جونىندەگى تاپسىرماسى بار. وسى باعىتتا وبلىسىمىزدا ءبىرقاتار ىستەر اتقارىلدى، - دەپ ەرەكشە اتاپ ءوتتى نۇرلان نوعايەۆ. – ءبىز بيزنەستى دامىتۋ جانە ينۆەستيسيالىق احۋالدى جاقسارتۋ ءۇشىن بارلىق جاعدايلاردى جاسايمىز. ءسىزدىڭ ەلدەن كەلگەن كومپانيالار بىرلەسكەن جوبالار قۇرۋ ءۇشىن بارلىق قاجەتتى كومەكتى الا الاتىنىنا سەندىرگىم كەلەدى.
اتىراۋ وبلىسىنىڭ فرانسيامەن سىرتقى ساۋدا اينالىمى 2018 جىلدىڭ ءبىرىنشى توقسانىندا 854،9 ملن. اقش دوللارىن قۇرادى، بۇل وتكەن جىلدىڭ سايكەس كەزەڭىنە قاراعاندا 27،6%-عا ارتىق. ءوڭىر اۋماعىندا فرانسۋز كاپيتالىنىڭ قاتىسۋىمەن 8 كومپانيا جۇمىس جاسايدى.
ءوز كەزەگىندە فرانسيانىڭ قازاقستانداعى توتەنشە جانە وكىلەتتى ەلشىسى فيليپپ مارتينە وبلىس اكىمىمەن ەكى ەل اراسىنداعى ىنتىماقتاستىق بويىنشا الداعى جوسپارلارىمەن ءبولىستى.
- فرانسيا قازاقستانمەن تىعىز ىنتىماقتاستىق جاسايتىن ەلدەردىڭ ۇشتىگىنە كىرەدى. وسى جىلى ەكى ەل اراسىنداعى ستراتەگيالىق ىنتىماقتاستىق تۋرالى شارتقا 10 جىل بولادى، - دەدى فيليپپ مارتينە. ءبىزدىڭ كومپانيالارىمىز ءسىزدىڭ ەل اۋماعىنداعى كوپتەگەن ءىرى جوبالارعا قاتىسادى. ءبىز جاڭا تەحنولوگيالاردى ۇسىنۋعا، قازاقستان ەكونوميكاسىنىڭ ءتۇرلى سالالارى ءۇشىن كادرلار دايىنداۋعا قاتىسۋعا دايىنبىز. بالامالى ەنەرگەتيكانى، مادەني بايلانىستاردى دامىتۋ، ستۋدەنتتەردى فرانسيانىڭ جوعارعى وقۋ ورىندارىنا وقۋعا شاقىرۋ – بۇل ەكى ەل ەكونوميكاسىن بىرىكتىرۋدىڭ ءبىر بولىگى عانا.
سونىمەن قاتار فرانسۋز ەلشىسى كوپتەگەن جوبالاردى ىسكە اسىرۋعا جانە فرانسيا مەن قازاقستان اراسىنداعى مادەني بايلانىستاردى دامىتۋعا مۇمكىندىك بەرەتىن الدا بولاتىن قازاقستان-فرانسۋز فورۋمى تۋرالى دا اڭگىمەلەدى.
كەزدەسۋ سوڭىندا وبلىس اكىمى نۇرلان نوعايەۆ وڭىردە ءوزارا ءتيىمدى ىنتىماقتاستىقتى جولعا قويۋعا بولاتىن وتە كوپ سالالاردىڭ بارىن ايتا كەلە، فرانسيا وكىلدەرىن اتىراۋ وبلىسىنا ءجيى كەلۋگە شاقىردى.
