قوعام بەلسەندىسى ارۋجان سايىن تۇركىستان وبلىسى سارىاعاش اۋدانى اباي اۋىلىندا زورلاندى دەگەن 7 جاسار بالانىڭ ىسىنە قاتىستى اقپارات بەردى. بيىل ناۋرىزدا بۇكىل قازاقستاندى دۇرلىكتىرگەن ءىس جابىلعان جوق. ارۋجان سايىننىڭ ايتۋىنشا، تەرگەۋ جالعاسىپ جاتىر.

"بالا اناسىمەن انالار ۇيىندە جاتىر. ءبىزدىڭ كوماندا ولارعا بارىنشا كومەكتەسىپ جاتىر. قۇرمانعازى ءمۇسىر اباي اۋىلىنان بالانىڭ اجەسىمەن بىرگە جۇرەتىن ادۆوكات ىزدەپ جاتىر. ءبىراق ازىرگە تابىلمادى.

ءىس جابىق تۇردە ءجۇرىپ جاتىر. سوندىقتان ونداعى ءىستىڭ ءمان-جايىن بىلە المايمىز. اناسى مەن ادۆوكاتى ەشتەڭە ايتپاۋ تۋرالى قۇجاتقا قول قويدى. ال تەرگەۋشى مەنىڭ قوڭىراۋلارىما جاۋاپ بەرمەيدى. ونىڭ ۇستىنە مەن ءاۋ باستا تەرگەۋ قىزمەتىنىڭ باسشىلىعىنا بريفينگ وتكىزۋ جايلى ۇسىنىس تاستاعانمىن. سەبەبى قازاقستاندىقتاردىڭ ءبارى دەرلىك بالانىڭ تاعدىرىنا الاڭداپ وتىر. حالىققا قۇرمەت كورسەتىپ، اقپاراتتاندىرىپ وتىرۋ قاجەتتىگىن جەتكىزدىم.

ءتىپتى ول بولماسا دا، بالانىڭ قۇقىعىن قورعاۋ ماسەلەسىندە ءۇنسىز قالعاندار مەن پويىزدان ءتۇسىرىپ العاندار جانە تاعى باسقا زيان كەلتىرمەك بولعاندارعا قاتىستى ءىستىڭ ءمان-جايىن بىلۋگە حالىق قۇقىلى. بۇل ماسەلەلەر كامەلەتكە تولماعان بالاعا جاسالعان زورلىققا قاتىسى جوق، ول ادامدار ءوز مىندەتتەرىن زاڭعا سۇيەنىپ ورىنداۋى ءتيىس ەدى.

بىزگە بەرىلگەن بار اقپاراتتى ءبىز تەرگەۋ ورنىنا اپارىپ تاپسىرامىز. ماسەلەن، اباي تۇرعىندارى تاعى ءبىر قۇرباننىڭ بار ەكەنىن ايتقاندا ءبىز بۇل تۋرالى بالالاردىڭ قۇقىعىن قورعاۋ كوميتەتى مەن تەرگەۋ قىزمەتىن حاباردار ەتتىك. ەگەر قانداي دا ءبىر دەرەكتەرىڭىز بولسا، ماعان جەكەگە جازىڭىزدار، ءبىز تەرگەۋشىلەر مەن ادۆوكاتتاردىڭ ءنومىرىن بەرەمىز"، - دەپ جازدى سايىن Facebook-تەگى پاراقشاسىندا.

ايتا كەتەيىك، بيىل ناۋرىزدا «اباي اۋىلىندا جەتى جاسار بالا زورلاندى» دەگەن اقپارات بۇكىل قازاقستاندى دۇرلىكتىرگەن ەدى. دەرەكتەرگە سايكەس، ءبىرىنشى سىنىپتا وقيتىن بالانى 5 اي بويى وزىنەن 7-8 جاس ۇلكەن ءتورت وقۋشى زورلاپ كەلگەن. بالانىڭ اجەسى ءتيىستى ورگاندارعا بىرنەشە مارتە جۇگىنسە دە، تىرپ ەتىپ قوزعالعان ەشكىم بولمادى.

بۇل ءىس مەملەكەت باسشىسى نۇرسۇلتان نازاربايەۆتىڭ نازارىن وزىنە اۋداردى. "قاۋىپسىزدىك كەڭەسىنىڭ وتىرىسىندا دا مەملەكەتتىك ورگاندارداعى پروبلەمالاردى اشىق ايتتىم. ماسەلەن، وقو-داعى جوعارى سىنىپ وقۋشىلارى زورلاعان بالانىڭ وقيعاسى. ءىس ۇزاققا سوزىلىپ، تۋعان-تۋىسقاندارىن اۋرە-سارساڭعا سالدى. ءبارىبىر دە ەشتەڭە تابا الماي، دالەلدەي المادىق. نەگە ەكەنىن بىلەسىزدەر مە؟ بارلىق جەردە تۋىسقاندارى وتىرعان. بۇل ىسپەن اينالىسقان پوليسەيلەر دە – تۋىستارى، جوعارى ورگانداردا دا تۋىستار، ودان جوعارىدا دا – تۋىستارى، ءبارى ءىستى جابۋ ءۇشىن جاسالعان"، — دەگەن ەدى پرەزيدەنت "نۇر وتان" پارتياسى ساياسي كەڭەسىنىڭ كەڭەيتىلگەن وتىرىسىندا.