بۇگىن استاناداعى ورتالىق كوممۋنيكاسيالار قىزمەتىندە FIFA-2018 فۋتبولدان الەم چەمپيوناتىنىڭ قورىتىندىسىنا ارنالعان باسپا ءسوز ءماسليحاتى ءوتتى. شاراعا «قازاقستان» تەلەراديوكورپوراسياسىنىڭ باسقارما ءتوراعاسى ەرلان قارين جانە «Qazsport» تەلەارناسىنىڭ ديرەكتورى پاۆەل سىبۋلين قاتىستى.

بريفينگ بارىسىندا ءسوز العان باسقارما ءتوراعاسى ەرلان قارين: «فۋتبولدان الەم چەمپيوناتى بۇل بارلىق فۋتبولسۇيەر قاۋىم ءۇشىن سپورت الەمىندەگى ماڭىزدى دا، قۋانىشتى وقيعالاردىڭ ءبىرى. وزدەرىڭىز بىلەتىندەي، «Qazaqstan» جانە «Qazsport» تەلەارنالارى فۋتبول ويىندارىنىڭ بارلىق 64 ماچىن تىكەلەي ەفيردە كورسەتتى. رەسەيدەگى FIFA-2018 كورسەتكىشى 2014 جىلعى الەم چەمپيوناتىنا قاراعاندا 16% -عا ارتتى. «Qazaqstan» تەلەارناسىندا ەڭ كوپ قارالعان ماچ رەتىندە رەسەي - ەگيپەت قۇرامالارى اراسىنداعى تارتىس بولدى. ويىننىڭ ۇلەسى 47،4% ال، كورسەتكىشى 6،97 پايىزدى قۇرادى. Cونداي-اق، «Qasport» تەلەارناسىندا كورسەتىلگەن رەسەي-حورۆاتيا قۇرامالارىنىڭ ويىنى ۇزدىكتەر قاتارىنا ەنىپ، 44،3% ۇلەسىمەن 7،32% رەيتينگتىك كورسەتكىشكە جەتتى. ال، ەڭ تومەنگى رەيتينگ شۆەيساريا - كوستا-ريكا اراسىنداعى ماچ بولدى، ۇلەسى 5،3%-دى قۇراسا، رەيتينگىسى 0،58%. ايتا كەتۋ كەرەك، ءاربىر ماچتىڭ ورتاشا اۋديتورياسى شامامەن جارتى ميلليونعا جۋىق كورەرمەن جينادى. ونىڭ ىشىندە كورسەتىلىم جاعىنان ەڭ جوعارى كورسەتكىشكە يە بولعان رەسەي-حورۆاتيا ويىنىن LIVE رەجيمىندە 339 455 ادام تاماشالادى. ال، رەسەي-ساۋد ارابياسى اراسىنداعى ويىندى بار-جوعى 16 819 ادام قاراعان. سونداي-اق، كورەرمەندەر فۋتبولدى «Qazaqstan TV» ءموبيلدى قوسىمشاسىنان كورۋ مۇمكىندىگىنە يە بولدى، قازىرگى ساتتە بۇل قوسىمشا 263 511 رەت جۇكتەلگەن. تاعى ءبىر جاقسى جاڭالىعىمىز، 2022 جىلى كاتاردا وتەتىن فۋتبولدان الەم چەمپيوناتىن ترانسلياسيالاۋ قۇقىعىنا يە بولدىق»، دەدى.
بريفينگكە قاتىسقان «Qazsport» تەلەارناسىنىڭ ديرەكتورى پاۆەل سىبۋلين فۋتبولدان الەم چەمپيوناتىنىڭ تىكەلەي ەفيردەگى كورسەتىلىمى جوعارى دەڭگەيدە بولعانىن ايتادى. «FIFA-2018 كورسەتىلىمىن جوعارى دەڭگەيدە وتكىزدىك دەپ ويلايمىن، سەبەبى جاقسى پىكىرلەر ايتىلىپ جاتتى. 7 شىلدەدە «Qazsport» تەلەارناسى ورتاشا تاۋلىكتىك ۇلەسى جاعىنان 18،3 پايىزدى كورسەتىپ، ءابسوليۋتتى رەكورد ورناتتى. ارنانىڭ رەيتينگى 1،6%-دى قۇرادى. ال، رەسەي - حورۆاتيا ماچىندا بارلىق 6+ اۋديتورياسىمەن 1 018 910 كورەرمەن جيناپ رەكورد ورناتىلدى. كورەرمەندەرىمىز تاماشا ويىنداردىڭ كۋاسى بولدى، ءبىزدىڭ كوممەنتاتورلارىمىز بارىنشا اتسالىستى. تۇراقتى كوممەنتاتورلاردان بولەك، ەسەي جەڭىس ۇلى، ەرمۇحاممەد ماۋلەن، سەرگەي رايليان جانە باسقالارى ارنايى شاقىرتىلدى. سونداي-اق، كەيبىر ماچتاردى وقيعا الاڭىنان تىكەلەي جەتكىزۋ ءۇشىن رۋسلان باقىتجان مەن تيمۋر سۇلەيمەنوۆ سىندى بىلىكتى ماماندار بولدى. وسى شارانى قورىتىندىلاي كەلە، ەڭ ۇزدىك كوممەنتاتوردى انىقتاۋ ءۇشىن بايقاۋ جاريالاۋدى ۇيعاردىق. بايقاۋ الەۋمەتتىك جەلىلەردە كورپوراسيامىزدىڭ بارلىق اككاۋنتتارىندا جاريالانعان بولاتىن. 14 كوممەنتاتوردىڭ اراسىنان ەرمۇحاممەد ماۋلەن مەن ەسەي جەڭىس ۇلى، سەرگەي رايليان جانە تيمۋر سۇلەيمەنوۆ ەڭ كوپ داۋىس جيناپ، ۇزدىك كوممەنتاتور اتاندى. سونداي-اق، «قازاقستان» تەلەراديوكورپوراسياسىنىڭ اتىنا ساپالى جۇمىسى ءۇشىن فيفا-دان العىس حات جىبەرىلدى. بۇل ءتۋرنيردى ويداعىداي وتكىزۋىمىزدىڭ ءبىر سەبەبى، قىزمەتكەرلەردىڭ جۇمىلا جۇمىس ىستەۋىنىڭ ارقاسىندا. بارلىقتارىڭىزعا العىسىمدى بىلدىرەمىن»،- دەدى تەلەارنا ديرەكتورى. ەستەرىڭىزگە سالا كەتەيىك، 14 ماۋسىم - 15 شىلدە ارالىعىندا رەسەيدە فۋتبولدان الەم بىرىنشىلىگى وتكەن بولاتىن. بۇل جارىسقا الەمنىڭ ەڭ تاڭداۋلى 32 ۇلتتىق قۇراماسى قاتىستى. FIFA-2018ء-دىڭ قازاقستان رەسپۋبليكاسى اۋماعىنداعى رەسمي حابار تاراتۋشىلارى - «QAZAQSTAN» جانە «QAZSPORT» تەلەارنالارى بولدى.