«اتامەكەن» ۇلتتىق كاسىپكەرلەر پالاتاسى «Atameken Services» ەلەكتروندى اقپارات جۇيەسىن ىسكە قوستى. ەندى كاسىپكەرلەر سەگىز باعىتقا توپتاستىرىلعان 61 قىزمەت ءتۇرىن ۇيىندە وتىرىپ-اق، ۇيالى تەلەفون نەمەسە كومپيۋتەر ارقىلى ونلاين رەجىمدە پايدالانا الادى.
كەشە «اتامەكەن» ۇلتتىق كاسىپكەرلەر پالاتاسى ساراپشىلارىنىڭ قاتىسۋىمەن وتكەن بەينەكونفەرەنسيادا پالاتانىڭ نارىقتى ساراپتاۋ جانە قاداعالاۋ ورتالىعىنىڭ ديرەكتورى سەرىكبەك ەلشىبەكوۆ «Atameken Services» - ەلىمىزدى سيفرلاندىرۋ اياسىنداعى جاڭا جوبا ەكەنىنە توقتالىپ ءوتتى. بيزنەستى قارجىلىق ەمەس قولداۋعا باعىتتالعان پلاتفورما كاسىپكەرلەرگە «اتامەكەن» ۇكپ قىزمەتتەرىنە تەگىن ءارى ىڭعايلى قول جەتكىزۋى ءۇشىن قۇرىلعان. كاسىپكەرلەر اقپاراتتىق جۇيەنىڭ كومەگىمەن سەرۆيستىك قولداۋ بويىنشا وتىنىمدەر بەرە الادى. بيزنەس جۇرگىزۋگە قاجەتتى بارلىق قىزمەت ءتۇرى بويىنشا كەڭەستەر الۋمەن قاتار قۇجات اينالىمىنا جۇمسالاتىن ۋاقىتتى ۇنەمدەيدى.
قازىرگى تاڭدا ەلىمىز بويىنشا «اتامەكەن» ۇكپ-نىڭ 189 كاسىپكەرلەرگە قولداۋ كورسەتۋ ورتالىعى مەن 25 كاسىپكەرلەرگە قىزمەت كورسەتۋ ورتالىعى قىزمەت كورسەتەدى. ال جاڭا جۇيە قىركۇيەك ايىنىڭ سوڭىنا دەيىن بارلىق وبلىس ورتالىعى مەن اۋدانداردا قولجەتىمدى بولماق.
وعان قوسا ەلىمىزدىڭ بارلىق قالاسىندا كاسىپكەرلەرگە قاشىقتان كەڭەس الۋعا مۇمكىندىك بەرەتىن ارنايى قوعامدىق قولجەتىمدىلىك پۋنكتتەرى بولىمدەرى ىسكە قوسىلماق.
پىكىر قالدىرۋ