مەملەكەتتىك سەكتورداعى قىزمەتكەرلەر جۋرناليستەرمەن بايلانىستى نىعايتۋدىڭ ورنىنا، وزدەرىنە جاۋ ەتەدى. كسرو-نىڭ جابىق ساياساتىنا ۇيرەنگەن بيۋروكراتتار، وڭشەڭ!

بجزق ۇيىمى جۋرناليستەرگە جازعى مەكتەپ ۇيىمداستىرعان. "سۇراقتارىڭىزدى قويىڭىزدار" دەگەننەن باستاپ، ويدا جۇرگەن سۇراقتاردى قويا باستادىم. ولار كەيبىر سۇراقتارىم "دۇرىس ەمەس ۋاقىتتا" قويىلعانىن ايتىپ، جاۋاپ بەرۋدەن باس تارتتى. باسپا ءسوز قىزمەتى باسشىسىنىڭ ايتۋىنشا، ولار جۋرناليستەردى قور جۇمىسىمەن تانىستىرۋعا جيناپتى. ونىڭ سىرتىنداعى سۇراقتاردى قويۋعا بولمايدى ەكەن.

مىسالى، مەن قارجى سالاسىنا قاتىسى جوق ءىس-شارادا قايرات كەلىمبەتوۆتى كورىپ قالسام، "بۇگىن ودان AIX (حالىقارالى بيرجا) تۋرالى سۇراۋعا بولمايدى، باسقا شارادا ءجۇرمىز" دەمەيمىن عوي. سولاي دەپ، ودان پىكىر المايتىنداي، كەلىمبەتوۆتى كۇندە كورىپ جۇرسەم ەكەن؟! ونسىز دا "نەدوستۋپنىي" ادامداردى ءبىر كورگەندە، ويداعى سۇراقتاردى جاۋدىرۋدىڭ نەندەي جاماندىعى بار؟! وڭتايلى جاعدايدى پايدالانۋ ءبىز ءۇشىن وتە ماڭىزدى.

قور قاراپايىم حالىقتىڭ سالىپ وتىرعان قارجىسىنان قۇرالعاندىقتان، ازاماتتاردىڭ ۇيىمنىڭ جۇمىسى، جوبالارى مەن ينۆەستيسيالىق ستراتەگياسى تۋرالى ءبىلىپ وتىرۋعا قۇقىعى بار. سوسىن بجزق-دا زەينەتاقى قورىنان بولەك، "مەنشىكتى قور" دەگەن بار. ونى اكىمشىلىك شىعىنداردى جابۋ ماقساتىندا قۇرعان. ونى تۇسىنەمىز. ءبىراق ول قور قالاي قۇرىلعانى، قالاي ءوسىپ جاتقانى، اكتيۆتەر پاكەتى جايلى سۇراساڭ، ۇلتتىق بانكقا سىلتەيدى. وتكەن جىلى ءدال وسى شارادا ۇلتتىق بانك وكىلىنەن دە سۇراعان بولاتىنمىن. ول مەنشىكتى قورعا قارجى رەتتەۋىشىنىڭ قاتىسى جوق ەكەنىن ايتقان.

دوڭگەلەك ۇستەلدە قوردىڭ اتقارۋشى ديرەكتورى مۇرات ءشارىپوۆ باستاعان بجزق ماماندارى وتىردى. ءشارىپوۆ مىرزا بىردەن تۇسىنىستىك تانىتتى. ال قالعان ماماندار، اسىرەسە، باسپا ءسوز قىزمەتىنىڭ جەتەكشىسى "ىنىشەك" دەپ ءسوزىمدى اياقتاتپاي قويدى. رەسمي جيىندا وتىرساق تا، ءسوزدى ءبولىپ، ويدى سوڭىنا دەيىن تىڭدامايتىن تۇردەگى "ەتيكادان" تىس پرينسيپتەرمەن سۇراق/سۇراق (سەبەبى جاۋاپتار بولعان جوق) وتكىزدىك.

سودان مەنىڭ تۇسىنگەنىم، ولارعا قور تۋرالى تەك "ءپوزيتيۆتى" اقپاراتتى تاراتۋشى جۋرناليستەر كەرەك. ال ولاردىڭ رەپەرتۋارىندا جوق سۇراقتاردى باعىتتاساق، ءبىزدى جاۋ كورە باستايدى. جۋرناليستەر "وپپوزيسيا" ەمەس، ءوزارا بايلانىستى قامتاماسىز ەتەتىن سەكتور قىزمەتكەرلەرى!

راسىندا، جۋرناليستەر مەملەكەتتىك سەكتور مەن قاراپايىم ازاماتتار اراسىنداعى مەدياتور قىزمەتىن اتقارادى. ازاماتتار بىلۋگە ءتيىس اقپاراتتى بەرۋگە مىندەتتىمىز. سىني كوزقاراستاعى ماقالا جازعاندا "بجزق قىزمەتكەرلەرىنىڭ باسىن جەرگە قاراتۋدى" باستى ماقسات ەتپەيمىز. ولار دا "ادام". قاتەلەسەدى. ءبىراق سول قاتەلىكتەرمەن بىرگە جۇمىس ىستەسەك، ماسەلەنى تەزىرەك شەشۋگە بولادى عوي. جوق.

"پاسان" دەپ، ويىمدى تىڭداۋدى دا ءجون كورمەدى. وڭشەڭ كسرو كەزىنەن قالعان بيۋروكراتتار وتىرىپ العان. حالىقتىڭ سىنىن ولار كەرىسىنشە "feedback" رەتىندە پايدالانسا، وزدەرىنە ءتيىمدى بولارىن، ورتاق كوممۋنيكاسيا كانالىن قۇراتىنىن بىلمەي وتىر.

قازىرگى قوعامدا مەملەكەتتىك سەكتور قىزمەتىنە قاتىستى جاستاردىڭ "سكەپتيكالىق" كوزقاراسى بار. بولۋى دا كەرەك! بيلىك باسىنداعى ادامدار حالىقتى بيلەۋ ءۇشىن ەمەس، ولارعا قىزمەت كورسەتۋ ءۇشىن سايلانعان نەمەسە تاعايىندالعان. تەك سىني كوزقاراسپەن ولاردىڭ بارىنشا دۇرىس باعىتتا جۇمىس ىستەۋلەرىنە سەپتىگىمىزدى تيگىزە الامىز!

جولداس ورىسبايەۆ