2018-2019 جىلدارى اقتوبە وبلىسىندا 6،4 ملرد. تەڭگە سوماسىنا 19 گازبەن جابدىقتاۋ جوباسى ىسكە اسىرىلاتىن بولادى.

بۇل تۋرالى وڭىرلىك كوممۋنيكاسيالار قىزمەتىندەگى باسپا ءسوز كونفەرەنسياسى بارىسىندا اقتوبە وبلىسىنىڭ ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسىنىڭ باسشىسى داستان امانوۆ حابارلادى.

ونىڭ ايتۋىنشا گاز قۇبىرلارىنىڭ جالپى ۇزىندىعى 6 270 كم قۇرايدى. اقتوبە وبلىسىنداعى 374 ەلدىمەكەننىڭ 115-نە گاز تارتىلعان، ولاردا 752 مىڭنان استام ادام تۇرادى.
«2018 جىلى جالپى سوماسى 483،2 ملن.تەڭگە بولاتىن 3 اۋىسپالى جوبانى، ونىڭ ىشىندە، ايتەكە بي اۋدانىنىڭ ارالتوبە اۋىلىنا گاز جەتكىزۋ قۇبىرىنىڭ، ايتەكە بي اۋدانىنىڭ ارالتوبە اۋىلىنداعى كەنتىشىلىك گاز قۇبىرىنىڭ جانە حرومتاۋ اۋدانىنىڭ جازىق اۋىلىنداعى ايتەكە بي اۋدانىنىڭ ارالتوبە اۋىلىنا كەنتىشىلىك گاز قۇبىرىنىڭ قۇرىلىسىن اياقتاۋ جوسپارلانىپ وتىر. ەكى جىل ىشىندە جالپى سمەتالىق قۇنى 6،4 ملرد.تەڭگە بولاتىن 19 گازبەن جابدىقتاۋ جوباسى ىسكە اسىرىلاتىن بولادى»، - دەدى داستان امانوۆ.

ولاردىڭ اراسىندا ايتەكە بي، العا، بايعانين، ويىل، ىرعىز، مۇعالجار، تەمىر، قوبدا اۋداندارىنىڭ اۋىلدارىنا گاز جەتكىزۋ جانە كەنتىشىلىك قۇبىرلار قۇرىلىستارى بار. 14 جوبا بويىنشا قۇرىلىس-مونتاج جۇمىستارى جۇرگىزىلۋدە. ولاردى پايدالانۋعا بەرۋ 2019 جىلعا جوسپارلانعان. وسى جوبالاردى جۇزەگە اسىرۋ ناتيجەسىندە تۇرعىنداردى گازبەن جابدىقتاۋمەن قامتاماسىز ەتۋ 89% قۇرايدى.

سونىمەن قاتار، الەۋمەتتىك نىسانداردى تابيعي گازعا كوشىرۋ جونىندە دە شارالار الىنۋدا. بۇگىنگى تاڭدا 38 الەۋمەتتىك نىساننىڭ 28ء-ى گازعا اۋىستىرىلدى.