الەۋمەتتىك جەلى «شىمكەنت وبلىسىندا 80 جاستاعى كەمپىردى زورلاپ كەتكەن» دەگەن ۆيدەو تاراپ جاتىر. بۇل جەرگىلىكتى ارنانىڭ ءتىلشىسى دايىنداعان سيۋجەت بولسا كەرەك. ول جەردە مارجان ابىلايەۆا دەگەن ازاماتشا سۇمدىق وقيعانى بىلايشا اڭگىمەلەپ بەرەدى: «3 ادام كۋاگەر بولسا، شىندىق بولادى دەيدى. ادىلدىكتىڭ قايدا ەكەنىن مەن بىلمەيمىن. وسىنداي جاعدايعا جەتىپ وتىر مەنىڭ شەشەم. ەسىكتىڭ الدىنا شىققان شەشەمدى قىلقىندىرىپ الا جونەلەدى. ءتۇن بولعاسىن ءبىر ءىش كويلەكپەن جاتقان. سول كيىممەن شىعىپ كەتكەن. اياعىندا كەبىس بولعان. «قۇتقارىڭدار» دەپ ايعايلاعان، ءبىراق ەشكىم ەستىمەگەن. ارىققا اپارعاندا سۋ بولماعان. سوسىن «سەنىڭ ماسقاراڭدى شىعارامىن» دەپ ەگىستىككە الىپ كەتكەن. ەگىستىككە سۇيرەپ اكەتىپ، سوراقى جاعدايعا دۋشار ەتەدى» دەپ شىندىقتى ايتادى. ءتىلشىنىڭ ايتۋى بويىنشا، كەيۋاناعا قايىن اعاسىنىڭ بالاسى تاپ بەرگەن. اۋىلداعى ەگىستىككە شىعارىپ، ويىنا كەلگەنىن جاساعان. اۋداندىق ءىىب-نان ادىلدىك تاپپاعان اناسى مەن قىزى جەرگىلىكتى «نۇر وتان» پارتياسىنان كومەك سۇراۋدا.

بۇل ۆيدەو ەسكى مە، جاڭا ما، ول جاعى ازىرگە بەلگىسىز. ماسەلە ونىڭ قاشان شىققاندىعى دا ەمەس. قىنجىلتاتىنى – ەكى كۇننىڭ بىرىندە بالا جوعالادى، بالا زورلانادى. جۇرەكتى اۋىرتاتىن، كوڭىل-حوشتى تۇسىرەتىن جاعىمسىز جاڭالىقتاردان كوز اشا الماي قالدىق. گۋگلدىڭ ىزدەۋ جۇيەسىنىڭ كومەگىنە سۇيەنسەك، اقتوبەدە، پاۆلوداردا، تالدىقورعاندا 80 جاسقان كەمپىردى زورلادى دەگەن اقپارات تولىپ ءجۇر.

پسيحولوگ تورەعالي باتىرحان Qamshy.kz اقپارات اگەنتتىگىنىڭ تىلشىسىنە بەرگەن سۇحباتىندا بىلاي دەيدى: «اۋرۋىن جاسىرعان ولەدى» دەيدى. جۋرناليستەر، ب ا ق جاعىمسىز جاڭالىق بولسا دا بەرۋگە مىندەتتى. سەبەبى اقپاراتتىڭ ءبارى ادامنىڭ ساقتانۋى ءۇشىن جۇمىس جاسايدى. ءبىراق جيىركەنىپ، سىناۋدىڭ ورنىنا ەلىكتەپ، كەرىسىنشە قابىلدايتىندار دا تابىلادى. سوڭعى كەزدە جاعىمسىز جاڭالىقتىڭ كوبەيۋى «ەشنارسە كورمەيمىن دەپ كوزىن بايلاپ، ەشنارسە ەستىمەيمىن دەپ قۇلاعىن بىتەپ تاستاعان قازاقستاندىق قوعامدىڭ قانشالىقتى دەرتتى، قانشالىقتى جابىق ەكەندىگىن كورەمىز. ەشكىم ەشكىمگە كەرەك ەمەس. تۇراقتى باسپاناسى، تۇراقتى جۇمىسى، تۇراقتى ايلىعى جوق ادام ومىرگە بەيجاي قاراي باستايدى. ىزا مەن رەنىشتىڭ سىرتقا شىقپاۋ سالدارىنان (باستىعىنا ايتۋدان قورقادى، دوسىنا ايتۋدان ۇيالادى دەگەندەي) ءىشى نەگاتيۆ تاۋ-تاۋ بولىپ جينالادى. توبەلەس باستالسا پىشاقتى سۋىرىپ الىپ پىشاقتاسۋعا دايىن تۇرادى. كەرەك بولسا ولۋگە دە دايار. ونى سەبەبى ەشنارسە ۇستاپ تۇرعان جوق. "ال، ماعان نە ىستەيسىڭ؟" دەپ كەۋدە كەرەدى. قوعامنىڭ جابىق ءومىر سۇرۋىنەن قىلمىس كوبەيۋدە. ەۋروپا مۇنىڭ ءبارىن باستان وتكىزگەن. سوندىقتان دا ولار قاتەلىكتى تۇزەپ، اشىق قوعام ساياساتىن تاڭداپ وتىر. بىزگە دە تاڭداۋ جاساۋ قاجەت-اق».