قىز بالانىڭ قوعامداعى ءرولى، قۇقىعى ەسكىرمەيتىن تاقىرىپ. كەي ەلدەردە ءالى كۇنگە دەيىن قىزدىڭ قۇقىعى اياققا تاپتالىپ جاتقانى جاسىرىن ەمەس. الىسقا بارماي-اق وتباسىندا جەرگىلىكتى ءداستۇر مەن نانىم، سەنىمنىڭ جەتەگىندە كەتىپ، تۋعان بالاسىنىڭ بولاشاعىنا بالتا شاۋىپ جاتقان جاعدايلار بولىپ تۇرادى. ماسەلەن، ءۇندىستاندا قىزعا ءبىلىم الىپ، ءوز ومىرىنە، بولاشاعىنا قاتىستى تاڭداۋ جاساۋعا مۇمكىندىك بەرمەيدى. ءۇندى فيلمدەرىندەگى قىزدىڭ ەركىنەن تىس كۇيەۋگە بەرۋ سەكىلدى جاعدايلار شىن ومىردە دە ءجيى كورىنىس تابادى. وعان انۋشا ەسىمدى ءۇندى قىزىنىڭ باستان وتكەرگەن جاعدايى دالەل. ءقازىر بريتانيادا تۇراتىن ءۇندى قىزىنىڭ وقيعاسىن BBC جاريالادى. ونداعى ماقساتى الەمدە قىزدىڭ قۇقىعىن قورعاۋ ماسەلەسى ءورشىپ تۇرعانىن كورسەتۋ بولسا كەرەك. ماحاببات، وتباسىلىق ءومىر، اتا-انا مەن بالانىڭ، اتا-ەنە مەن كەلىننىڭ اراسىنداعى قارىم-قاتىناستا ماسەلەلەردى قوزعاعان انۋشانىڭ اڭگىمەسىن نازارلارىڭىزعا ۇسىنۋدى ءجون كوردىك. 

بالا كەزىمنەن تانىمايتىن، سۇيمەيتىن ادامعا تۇرمىسقا شىعاتىنىمدى ءبىلدىم. ءبىزدىڭ اۋلەتىمىزدە قىزدى مەنشىك، زات رەتىندە قابىلدايدى. ءبىرىنشى اتا-اناڭنىڭ، ودان كەيىن كۇيەۋىڭنىڭ مەنشىگى بولاسىڭ. قىزعا ەر ادامدارعا قىزمەت ەتىپ، بالانى دۇنيەگە اكەلەتىن زات سەكىلدى قارايدى.

مەن ءۇندىستاندىق وتباسىندا دۇنيەگە كەلدىم. ەكى اعام ەركىندىكتە ءومىر ءسۇردى. ولار ۋنيۆەرسيتەتتە وقىدى. ال مەن ءۇي جيناپ، تاماق ءپىسىرۋ سەكىلدى جۇمىستارمەن اينالىساتىنمىن.

مەكتەپتە وقىپ ءجۇرىپ، جوو-دا وقۋدى، مامان بولۋدى ارماندادىم. ول ءۇشىن ارنايى كۋرسقا دا بارىپ جۇرگەن ەدىم. ءبىراق اتا-انام كۋرستى تاستاۋعا ماجبۇرلەدى. بولاشاققا دەگەن جوسپارىمنىڭ كۇل-تالقانىن شىعاردى. مەن مامان يەسى ەمەس، جاقسى جار، انا بولۋ كەرەكتىگىمدى ايتىپ وقۋدان شىعارىپ الدى.

اتا-انام 60-شى جىلدارى ءۇندىستاننان بريتانياعا كوشىپ باردى. ولار تانىسقانىنان ءبىر اپتا تولعاندا وتباسىن قۇرعان. اتا-انامنىڭ بىر-بىرىنە دەگەن ماحابباتىن، جىلۋلىعىن كورگەن ەمەسپىن. بىر-بىرىنە بوتەن ادام سەكىلدى ءومىر ءسۇرىپ كەلەدى.

بالالىق شاعىم قيىندىققا تولى بولدى. اتا-انامنىڭ دوسى مەن بوي جەتىپ كەلە جاتقاندا قىرىندايتىن. ازياتتىق بولعانىم ءۇشىن مەكتەپتە تالاي قورلىقتى كوردىم.

ماعان «بۇلىنگەن تاۋار» سەكىلدى قارادى. 19 جاسىمدا ءۇندىستانعا «تازارۋ» ءۇشىن جىبەردى. بويىمنان جىن مەن شايتاندى شىعارۋ كەرەك ەكەن-مىس. تازاردى دەگەندە تۋىستارىم ماعان كۇيەۋ ىزدەي باستادى. مەن وتباسىن قۇرۋعا ءالى دايىن ەمەس ەكەنىمدى ايتىپ، بارلىق جىگىتتىڭ بەتىن قايتارىپ تاستادىم. تۋىستارىم ەكى ايدان كەيىن مەنى بريتانياعا قايتاردى.

بىرنەشە كۇننەن كەيىن تۇندە ۇيدەن قاشىپ كەتىپ، باسپاناسى جوقتارعا ارنالعان ورتالىقتان ءبىراق شىقتىم. تامىرىمدى كەسىپ، ءدارى ءىشتىم. ەسىمدى جيسام اۋرۋحانادا جاتىر ەكەنمىن.

ەكى اپتادان كەيىن اتا-انام ماعان كۇيەۋ ىزدەۋگە قايتا كىرىستى. ولار مەنىڭ سۋرەتىمدى يندۋيستىك عيباداتحاناعا ءىلىپ، ءۇندىستاندىقتار قالىڭدىق ىزدەيتىن سايتتاردا جاريالادى.

اتا-انام بولاشاق كۇيەۋ بالاسىن ۇزاق تاڭدادى. ءبىرى كارى بولسا، ەكىنشىسىنىڭ تاربيەسىندە كىنارات بولدى. ەندى بىرىمەن كاستامىز ءارتۇرلى بولىپ شىقتى. تاڭداپ ءجۇرىپ ماعان لايىقتىسىن تاپتى.

مەن بولەك بولمەدە وتىردىم. ول ۋاقىتتا اتا-انالار ءوزارا بىر-بىرىمەن كەلىستى دە، مەنى اتا-ەنەمە كورسەتۋ ءۇشىن بولمەگە كىرگىزدى.

جىگىتتىڭ تۋعاندارى وتباسىمىزدى بىلەتىن. ولار عيباداتحانا ارقىلى اتا-اناممەن بايلانىستى. ونىڭ وتباسىن بىرنەشە مينۋت قانا كوردىم. بولاشاق جارىم ماعان سالماقتى بولىپ كورىندى. ول مەيىرىمدى جانە قامقور بولادى دەپ ويلادىم.

ول باسقا قالادا تۇراتىن. ەكەۋىمىز حات الماسىپ تۇردىق. حاتىندا ماعان ۋادەنى ءۇيىپ توگىپ بەردى.

حاتتاردى اتا-اناما كورسەتكەندە ولار تاڭعالدى. ولار ءۇشىن بىرەۋدىڭ قىزعا ءسۇيىپ، ماپەلەۋگە ۋادە بەرگەنى ەرسى كورىندى. الايدا ۋاقىت وتە كەلە مەنىڭ  جاقسى وتباسىنا كەلىن بولاتىنىما قۋاناتىنىن ايتقان ەدى.

بالا كەزىمدە باستان وتكەرگەن جاعدايعا بايلانىستى كۇيەۋىممەن جىنىستىق قاتىناسقا ءتۇسۋ قيىنعا سوعاتىنىن ايتقان ەدىم. ول ءبىر-بىرىمىزدى جاقسى بىلگەنشە كۇتەتىنىن ايتتى.  دەسە دە توي كەزىندە ناعىز سۇمدىقتى باستان وتكەردىم. فوتودان مەنىڭ قاتتى قورقىپ تۇرعانىمدى بايقاۋعا بولادى. نەكەمىزدى مەملەكەتتىك مەكەمەدە ودان كەيىن عيباداتحانادا قيدىق.

جاسىم 20-دا ەدى. تويدان كەيىن كۇيەۋىمنىڭ ۇيىنە كوشۋىم كەرەك بولدى. تانىمايتىن ادامدارمەن ءبىر شاڭىراق استىندا تۇرۋ كەرەك دەگەن وي قورقىنىش ۇيالاتتى.

توي بولعان ءتۇنى كۇيەۋىم مەنى زورلادى. توسەككە جاتپاق بولعان جەرىمنەن قۇلاتتى دا ويىنداعىسىن ىسكە اسىردى. اناسىنا «ءىس ءبىتتى» دەپ حابارلادى.

مەن توسەكتە وتىرىپ العاشقى نەكە ءتۇنى مۇنداي بولماۋ كەرەك ەدى عوي دەپ ويلادىم. ونىڭ رومانتيكاعا تولى حاتتارىندا ماعان مۇلدە باسقا ءومىر سىيلايتىنىن ايتقان ەدى عوي.

اتا-ەنەمنىڭ ۇيىنە كوشكەندە ءومىرىم توزاققا اينالدى. اناسىنىڭ جاساۋىما كوڭىلى تولمايتىنىن ايتىپ، اشۋعا بۋلىقتى.

ول 1000 فۋنت، جاڭا كولىك پەن قىمبات تەلەديداردى تالاپ ەتتى. اتا-انامنىڭ وعان شاماسى جەتپەيدى. ەنەم ونىڭ ەسەسىن مەننەن الدى.

ول مەنى كۇندە تاڭعى بەستە وياتىپ ءۇيدى جيناۋعا ماجبۇرلەيتىن. تاڭعى ۇشكە دەيىن ۇيقى بەرمەيتىن. شاشىمدى قىرقىپ، نە جەپ نە ىشەتىنىمدى اڭدۋمەن بولدى. مۇنداي ومىرگە شىداماي، اۋرۋحانادان ءبىراق شىقتىم. ول جەردەن اتا-انام ۇيگە الىپ كەتتى. كۇيەۋىممەن اجىراستىم.

اجىراسقاننان كەيىن ءوزىمدى ەركىن سەزىندىم. ومىرىمدە وزگەرتەمىن دەپ شەشتىم.

گيپنوتەراپيا كۋرسى مەن رەيكا تەراپياسىن قابىلدادىم. بۇل – سترەسستەن ارىلۋدىڭ جاپوندىق ءادىسى.

ەر اداممەن تانىستىم، ەكەۋىمىزدىڭ قىزىمىز بار. وكىنىشكە قاراي، اجىراسىپ كەتتىك.

ءقازىر جاسىم 30-دا. جالعىز تۇرامىن. ومىرىمە ريزامىن. قىزىم ەركىندىكتە ءومىر سۇرگەنىن قالايمىن. قىزىم بىرەۋدىڭ مەنشىگى ەمەس، جەكە تۇلعا ەكەنىن سەزىنەتىندەي تاربيەلەيمىن.

جاقىندارىم تۋرالى جامان ويلاماۋعا تىرىسامىن. سەبەبى ولار كوز اشقالى كورگەن، بىلگەندەرىمەن ءومىر ءسۇرىپ كەلەدى. وتباسىنداعى ءداستۇر، مادەنيەتپەن سۋسىندادى.

ولاردىڭ اتا-اناسى دا ءدال وسىنداي قارىم-قاتىناس ورناتقان. جاقىندارىمنىڭ ولارعا قارسى شىعايتىنداي جىگەرى بولمادى.

مەنىڭ ويىمشا، ءومىر – قورلىققا، باسسىزدىققا شىداۋ ءۇشىن ەمەس، ماحاببات ءۇشىن بەرىلدى.